Friday, April 26, 2013

ကျောင်းစာကြည့်တိုက်များ တံခါးဖွင့်ထားပေးပါ




ကျွန်တော်ကြားဖူးတာတစ်ခုရှိပါတယ်။ သူများနိုင်ငံတွေမှာ မူလတန်းကျောင်းသားတွေအဖို့ ဘယ်စာအုပ်တွေ၊ ဘယ်ဝတ်ထုတွေကို ဖတ်ရမယ်၊ အလယ်တန်းကျောင်းသားတွေအဖို့ ဘယ်စာအုပ်တွေကို ဖတ်ကိုဖတ်ရမယ်၊ အထက်တန်းကျောင်းသားတွေအဖို့ ဘယ်စာအုပ်တွေကို ဖတ်ကို ဖတ်ရမယ်၊ တက်ကသိုလ်ကျောင်းသားတွေအဖို့ ဘယ်စာအုပ်တွေကို ဖတ်ရမယ်၊ အဲဒီစာအုပ်တွေကိုမှ မဖတ်ဖူးဘူးဆိုရင် အဲဒီ စာသင်တန်းကို တက်ရောက်ဖို့ အဆင့်မမီဘူးလို့ သတ်မှတ်ထားတယ်လို့ သိရပါတယ်။ နောက် ဘ၀တစ်သက်တာ မသေခင်အချိန်လေးအတွင်းမှာ ဖတ်ကို ဖတ်ရမယ့်၊ မဖြစ်မနေ ဖတ်ဖူးသင့်တဲ့ စာအုပ်တွေစာရင်းပြုစုပေးထားတာမျိုးတွေရှိပါတယ်။
ဒါကိုကြည့်မယ်ဆိုရင် သူများနိုင်ငံတွေမှာ စာအုပ်စာပေကို ဘယ်လောက်တန်ဖိုးထားလဲဆိုတာကို သိမြင်နိုင်သလိုပဲ တစ်ဆက်တည်း တွေးနိုင်တာက စာအုပ်စာပေဟာ ဒီလောက်တောင် လူတွေရဲ့ လောကမှာ လိုအပ်ပါလားဆိုတာကို ဆင်ခြင်မိကောင်း ဆင်ခြင်မိကြပါလိမ့်မယ်။ အဲဒီလို စာအုပ်စာပေတွေကို ကလေးသူငယ်အရွယ်ကတည်းက မဖတ်မနေရ သတ်မှတ်ထားတဲ့ နိုင်ငံတွေဟာ ကမ်ဘာမှာ ထိပ်တန်းရောက်နေတဲ့ နိုင်ငံတွေဖြစ်နေတာကို ကြည့်မယ်ဆိုရင် စာအုပ်တွေဟာ လူတွေကို သေချာပေါက်ကောင်းကျိုးများစွာ ဖြစ်ထွန်းစေနိုင်တယ်လို့ သုံးသပ်လို့ရပါတယ်။ သူတို့နိုင်ငံတွေရဲ့ ဖွံ့ဖြိုးတိုးတက်မှု ရေစီးမှာ စာအုပ်တွေရဲ့ ပံ့ပိုးထောက်ပံ့စွမ်းအားက တော်တော်ကြီးမားတယ်ဆိုတာကို ကျွန်တော်တို့ ခန့်မှန်းကြည့်လို့ရပါတယ်။ ဒီတော့ တိုးတက်ထွန်းကားနေတဲ့ ခေတ်မီနိုင်ငံတွေက နိုင်ငံကြီးသားတွေဟာ စာအုပ်စာပေကို နှစ်သက်မြတ်နိုးခုံမင်စွာ ဖတ်ရှုတတ်ကြတယ်ဆိုတာ ယုံမှားသံသယဖြစ်စရာမရှိတော့ပါဘူး။

ကျွန်တော်တို့ နိုင်ငံကို တစ်ချက်ပြန်ကြည့်မယ်ဆိုရင် ကျွန်တော်တို့ နိုင်ငံမှာ ပြည်သူလူထုက စာအုပ်စာပေကို တန်ဖိုးထားလေးစားမှု အတိုင်းအတာ က အင်မတန်ဆုတ်ယုတ်ကျဆင်းနေပါတယ်။ လူဦးရေ သန်းခြောက်ဆယ်ရှိတဲ့နိုင်ငံတစ်နိုင်ငံမှာ စာအုပ်ရေ ၅၀၀ ကို နှစ်နဲ့ ချီရောင်းတာတောင်မကုန်ဘူးဆိုတော့ သူများနိုင်ငံသားတွေက အံ့ဖွယ်သရဲဖြစ်ကြတယ်လို့ စာရေးဆရာတစ်ဦးပြောဖူးတာလေးလည်း ကြားဖူးပါတယ်။ စာရေးဆရာလုပ်မယ်ဆိုတဲ့ လူငယ်တွေဆိုရင်လည်း မွဲဆေးဖော်မလို့လားဆိုတဲ့ အထင်သေးနှိမ်ချချင်တဲ့ တုံ့ပြန်မှုမျိုးနဲ့ ရင်ဆိုင်တတ်ကြရပါတယ်။  သူများနိုင်ငံတွေမှာဆိုရင်တော့ စာရေးဆရာဆိုတဲ့ အနုပညာဖန်တီးသူတွေကို တလေးတစား ဂါရ၀နဲ့ကို ဆက်ဆံကြတာတွေက အထင်အရှားပါ။ တချို့ စာရေးဆရာ၊ ဆရာမတွေဆိုရင် လူထုကို အလွှမ်းမိုးနိုင်ဆုံး အနုပညာရှင်တွေလို့ ဆိုရမယ့် ရုပ်ရှင်မင်းသား၊ မင်းသမီး၊ အဆိုတော်တွေထက်ကို လူထုရဲ့ တန်ဖိုးထားချစ်ခင်ခြင်းကို ခံရပါတယ်။ မြန်မာနိုင်ငံမှာဆိုရင်တော့ စာရေးဆရာဆိုရင် စာအုပ်တွေကို မက်မက်မောမောဖတ်ရှုလေ့ရှိသူမျိုးကလွဲပြီး ကျန်တဲ့ လူထုက ထူးမခြားနားသာမန် လူတစ်ယောက်ကို တွေ့လိုက်ရသလိုမျိုးပဲ တုံ့ပြန်တတ်ကြပါတယ်။ ပြောချင်တာက စာရေးဆရာဆိုတာနဲ့ ရှိခိုးဦးတင် လုပ်ရမယ်ဆိုလိုတာမဟုတ်ပါဘူး။ စာရေးဆရာရဲ့ စာပေအပေါ် လေးစားတန်ဖိုးထားတတ်တာ၊ စာပေအနုပညာနဲ့ အနုပညာဖန်တီးသူကို မြတ်နိုးချစ်ခင်တာမျိုးကို ပြောချင်တာပါ။
ကျွန်တော်တို့ ပြည်သူလူထုမှာ အမှန်တကယ် စာကို မက်မက်စက်စက်ဖတ်ပါတယ်ဆိုတဲ့ လူဦးရေက တော်တော်လေး လျော့နည်းကျဲပါးနေတာကို ကျွန်တော်တို့ နီးစပ်ရာ ပတ်ဝန်းကျင်ကို ငဲ့စောင်းကြည့်လိုက်တာနဲ့ ထင်ထင်ရှားရှားကြီး ပေါ်လွင်နေပါတယ်။
ဒါကလည်း နှစ်ငါးဆယ်အမှောင်ခေတ်ကြီးထဲမှာ ထမင်းလေးတစ်လုတ်စားရဖို့အရေး သေလုမျောပါး ရုန်းကန်လှုပ်ရှားရတဲ့အခါ စာအုပ်ဖတ်ချိန်ရယ်လို့ မရှိတော့ကြတာတွေရယ်၊ အချိန်အားလေးရလာရင်တောင် တစ်နေကုန် တစ်နေခမ်း ပင်ပင်ပန်းပန်းနဲ့ ၀မ်းစာရှာဖွေရတာဖြစ်တဲ့အတွက် အေးအေးလူလူ အနားပဲယူချင်တော့တာတွေရယ်၊ ကန့်သတ်ထိန်းချုပ်မှုဘောင်တွေအောက်ကနေ စာရေးသူများက အနုပညာတွေ ဖန်တီးမွေးထုတ်ရတဲ့အခါ ခေတ်ရဲ့ ကောင်းကျိုးဆိုးပြစ်တွေအပေါ် ဝေဖန်သုံးသပ်ထောက်ပြမှုမျိုးတွေက အာဏာရှင်အစိုးရအတွက် အနှောင့်အသွားမလွတ်တော့ဘဲ ဖိနှိပ်ခံရပြီး စာပေကောင်းတွေ တိမ်မြှုပ်ခဲ့ရတာတွေလည်း ပါပါတယ်။ နောက် ခေတ်တစ်ခုထဲမှာ ရှင်သန်ဖြတ်သန်းနေကြရတဲ့ စာရေးသူအများစုက သူတို့ ဖြတ်သန်းကျော်လွှားနေရတဲ့ ခေတ်ကို မျက်ကွယ်မပြုပါဘူး။ ဒီတော့ အမှောင်ခေတ်ထဲက အကြောင်းအရာတွေကို ပုံဖော်တဲ့အခါ လူတွေက ကိုယ့်ဘ၀ကမှ မွန်းကျပ်ပါတယ်ဆို၊ သူများတွေရဲ့ မှောင်ပိန်းကျပ်ခဲနေတဲ့ ဘ၀တွေအကြောင်း စိတ်ပျက်ငြီးငွေ့စရာကြီးတွေ၊ မဖတ်ချင်ဘူးဆိုပြီး စာအုပ်တွေကို ရှောင်ဖယ်လာတယ်။ ငွေပေါပေါပဲပဲနဲ့ ခံစားလို့ရလာတဲ့ ရုပ်ရှင်ဗီဒီယိုတွေဘက်ကို အာရုံကျလာတယ်။ မွန်းကျပ်မှုကနေ ထွက်ပေါက်ရချင်တဲ့အခါ ဟာသမှ ခံစားတတ်တယ်ဆိုတာမျိုးဖြစ်လာပါတယ်။ ဒီလိုကနေ စာအုပ်စာပေအပေါ် လူတွေ တန်ဖိုးထားမှု ယုတ်လျော့ ကျဆင်းလာပါတယ်။
နိုင်ငံရပ်ခြားတိုင်းပြည်တွေမှာ စာကြည့်တိုက်လို အဆောက်အဦးမျိုးတွေဟာ ခံ့ခံ့ညားညား ထည်ထည်ဝါ၀ါ၊ စာအုပ်စာပေ စုံလင်ပေါများစွာနဲ့  ဒါ ငါတို့ နိုင်ငံက စာကြည့်တိုက်ရယ်လို့ လက်မထောင်နိုင်နေကြတဲ့အချိန်မှာ ကျွန်တော်တို့ ဆီမှာတော့ အမျိုးသားစာကြည့်တိုက်လို အဆောက်အဦးမျိုးက ဘယ်နားမှန်းတောင် မသိရပါဘူးတဲ့။ မြို့အသီးသီးမှာဆိုရင်လည်း မြို့ကိုယ်စားပြုစာကြည့်တိုက်မျိုးကို မတွေ့ရတတ်တာက များပါတယ်။
နောက် သူများနိုင်ငံတွေမှာဆို စာအုပ်စာပေတွေကို စာသင်တန်းအလိုက် မဖတ်မနေရ သတ်မှတ်ထားတာမျိုးမရှိဘူး။ အုပ်ချုပ်သူအစိုးရက သူတို့ရဲ့ နိုင်ငံရေး မူဝါဒတွေနဲ့ ကိုက်ညီမယ့် စာပေအနည်းငယ်မျှလေးကိုပဲ ပြီးစလွယ်ပြဌာန်းခဲ့တယ်။ ဒီတော့ ကလေးတွေ၊လူငယ်တွေမှာ ငယ်စဉ်ကတည်းက စာဖတ်ကျင့်က မစွဲမြဲတော့ဘူး။ မိဘတွေလိုပဲ ဟာသကားကြည့်လိုက်၊ ကလိထိုး ဟာသ၀တ်ထုလေး ကောက်ဖတ်လိုက်နဲ့ပဲ ရှင်သန်လာကြတော့တယ်။
အများစုသော မြန်မာနိုင်ငံသားတွေဟာ စာဖတ်ခြင်းက လူပျင်းတွေရဲ့ အလုပ်၊ အားနေတဲ့ လူတွေရဲ့ အလုပ်ရယ်လို့တောင် ခံယူထားကြတဲ့အထိ စာအုပ်စာပေနဲ့ စာဖတ်ခြင်းအပေါ် နားလည်မှုတွေ လွဲမှားလာတယ်။ အမှောင်ခေတ်အုပ်ချုပ်ရေးတွေကို ဖြတ်သန်းကြီးပြင်းလာပြီး ခုချိန်ခါမှာ တတိယအရွယ်ကို ရောက်နေကြပြီဖြစ်တဲ့ လူကြီးတွေအတွက်ကတော့ စာမဖတ်လဲ သိပ်ပြသနာမဟုတ်တော့ဘူး။ ဘာဖြစ်လို့လဲဆိုတော့ သူတို့အတွက် လမ်းကြောင်းက သိပ်များများစားစားမရှိတော့သလို၊ အချိန်ကာလဆိုတာကလည်း အရှည်မျှော်တွေးလို့ မရတော့ပါဘူး။ ဒီတော့ ကျွန်တော်တို့ လူကြီးတွေ စာမဖတ်တာလောက်ကို ဥပေက်ခါပြုထားလို့ရပါသေးတယ်။
ဒါပေမယ့် လူငယ်တွေ စာမဖတ်တာကိုတော့ ကျွန်တော်တို့ ဥပေက်ခါပြုထားလို့ လုံးဝမဖြစ်တော့ပါဘူး။ လက်ရှိ ပြောင်းလဲ ပွင့်လင်းလာနေတဲ့ ခေတ်ကြီးထဲမှာ မွေးဖွားကြီးပြင်းရှင်သန်နေကြတဲ့ ကလေးသူငယ် လူငယ်လူရွယ်တွေအဖို့ စာဖတ်ခြင်းက မရှိမဖြစ်ကို လိုအပ်နေတဲ့ ပြုကျင့်ဖွယ်အမှုကိစ်စတစ်ခုဖြစ်ပါတယ်။
စကားပုံတစ်ခုရှိပါတယ်။ တိုးတက်သော လူမျိုးသည် စာဖတ်ကြရွေ့ စာဖတ်သော လူမျိုးသည်တိုးတက်ကြသည်လို့ဆိုပါတယ်။ လက်ရှိကမ်ဘာမှာ ထိပ်တန်းရောက် တိုးတက်နေကြတဲ့ စာဖတ်တဲ့ လူမျိုး ၊ နိုင်ငံတွေနဲ့ ရင်ဆိုင်ယှဉ်ပြိုင်အနိုင်ကြဲရမှာက ဒီနေ့ခေတ်လူငယ်တွေနဲ့ လာလတ်တံ့သော လူငယ်များဖြစ်တဲ့အတွက် ဒီလူငယ်တွေ စာဖတ်ကြရပါမယ်။ ဆင်းရဲတွင်းနက်နေတဲ့ တိုင်းပြည်ကို အမှောင်ထုထဲကနေ လွတ်လွတ်ကျွတ်ကျွတ်ရုန်းထွက်နိုင်အောင် ၊ ဖွံ့ဖြိုးတိုးတက်တဲ့ နိုင်ငံတစ်ခုအဖြစ် ရောက်ဖို့ဆိုတာ လက်ရှိ အစိုးရမှာတင် တာဝန်ရှိတာမဟုတ်ဘဲ နိုင်ငံသားအားလုံးရဲ့ မလုပ်မဖြစ်တာဝန်ပါ။ အဲဒီမှာမှ လူငယ်တွေရဲ့ အင်အားက ပိုပြီး အရေးပါ အရာရောက်တာပါ။
စာဖတ်မှသာလျှင် ကျွန်တော်တို့ လူငယ်တွော အသိဥာဏ်ဗဟုသုတ ရင့်သန်ဖွံ့ထွားမယ်၊ ဆင်ခြင်တုံတရား ရင့်ကျက်ပြည့်ဝမယ်၊ ဆုံးဖြတ်ချက်တွေ ချမှတ်ရတဲ့အခါမျိုး၊ အခြေအနေတစ်ခုအပေါ် ဆင်ခြင်သုံးသပ်ပြီး ကောက်ချက်ဆွဲရတဲ့အခါမျိုးမှာ သင့်လျော်မှန်ကန်တဲ့ နည်းလမ်းကျတဲ့ ဆုံးဖြတ်ချက်မျိုးတွေ၊ ကောက်ချက်မျိုးတွေပေါ်ထွက်လာမှာ ဖြစ်ပါတယ်။ အခက်အခဲ၊ အကြပ်အတည်း၊ စိန်ခေါ်မှုတွေနဲ့ ထိပ်တိုက်ရင်ဆိုင်ကြုံတွေ့လာရပြီဆိုတဲ့အခါ စာဖတ်ထားသူဟာ စာအုပ်စာပေတွေထဲမှာ သူတွေ့ကြုံဖူးထားတဲ့ အဖြစ်အပျက်တွေ အကြောင်းအချက်တွေနဲ့ ချိန်ထိုးစဉ်းစားပြီး နည်းမှန် လမ်းမှန်အဖြေကို အကောင်းဆုံး ရှာဖွေနိုင်မယ်။ စာက ပေးတဲ့အသိအမြင်၊ စာကပေးတဲ့ အတွေ့အကြုံ၊ စာကပေးတဲ့ ခွန်အားတွေနဲ့ အရာရာ ရဲဝံ့တက်ကြွနေပါလိမ့်မယ်။ အာဏာနဲ့ တည်ဆောက်မရဘဲ အသိဥာဏ်နဲ့သာ တည်ဆောက်ရမယ့် ဖွံ့ဖြိုးတိုးတက်တဲ့ လူ့အဖွဲ့အစည်းမှာ စာဖတ်ခြင်းက အကောင်းဆုံးသော ၀မ်းစာပါပဲ။ ဒါကြောင့် မသိမှု အမိုက်အမှောင်ကို ဖယ်ရှားနိုင်ဖို့ လူငယ်တွေဟာ စာဖတ်ဖို့ အပူတပြင်းလိုအပ်လျက် ရှိနေပါတယ်။
ဒီလူငယ်တွေ၊ ဒီကလေးတွေ စာဖတ်တတ်လာစေဖို့ ကျွန်တော်တို့ ဘယ်လိုလုပ်ကြမလဲ။ သူတို့ရဲ့ စာဖတ်ကျင့်ကို ဘယ်လို ပြုစုပျိုးထောင်ပေးကြမလဲ။ သူတို့ရဲ့ မိဘတွေကိုချည်း အားကိုးလို့ လုံးဝမရပါဘူး။ ဘာကြောင့်လဲဆိုတော့ စာဖတ်ခြင်းဟာ အပိုအလုပ်လို့ ယူဆလာခဲ့ကြတဲ့ ခေတ်ကြီးထဲမှာ ကြီးပြင်းခဲ့ကြတဲ့ မိဘတွေက သူတို့ သားသမီးတွေကိုလည်း ပြင်ပ ဗဟုသုတစာပေတွေကို ဖတ်ရှုခွင့်မပေးတတ်ကြပါဘူး။ ၀တ်ထုဖတ်ရင် ကျောင်းစာ နောက်ကျမယ်၊ စာပဲကျက်ဆိုပြီး ကလေးတွေရဲ့ စာဖတ်ခွင့်ကို ဗီတိုအာဏာနဲ့ ရုပ်သိမ်းတတ်ကြပါတယ်။ ဒီတော့ ကျွန်တော်တို့ လူငယ်တွေ၊ ကလေးတွေဟာ စာဖတ်ကျင့်ရလာစေဖို့ စာသင်ကျောင်းတွေကို အားကိုးအားထားပြုရပါလိမ့်မယ်။ စာသင်ကျောင်းဆိုတာဟာ ကလေးတွေ အိမ်ကလွဲရင် အချိန်အများဆုံး ကျင်လည်ရာ ၊ ပျော်မွေ့ရာ နေရာဖြစ်လို့ပါ ။ ဒါကြောင့် စာသင်ကျောင်းတွေမှာ စာကြည့်တိုက်တွေ ရှင်သန်ဖွံ့ထွားနေဖို့ အရေးကြီးပါတယ်။
ဒီလိုဆိုတော့ ဟ……စာကြည့်တိုက်များ ကျောင်းတိုင်းလိုလိုမှာ ရှိသားပဲလို့ အလောသုံးဆယ် စောဒကတက်ချင်သူက တက်ပါလိမ့်မယ်။ ဆန်ဒမစောပါနဲ့။ ကျွန်တော် ရှင်းပါမယ်။
ကျွန်တော်တွေ့ဖူးတဲ့ စာကြည့်တိုက်တွေကို နှစ်မျိုး နှစ်စားခွဲကြည့်လို့ရပါတယ်။ ပထမအမျိုးအစားက စာကြည့်တိုက် အဆောက်အအုံကြီးထားရှိပါလျက် တံခါးတွေ သော့ခတ်ထားတဲ့ စာကြည့်တိုက်မျိုးပါ။ နောက်တစ်မျိုးက  စာကြည့်တိုက် တံခါးတွေတော့ဖွင့်ထားပါရဲ့၊ ကလေးတွေမှာ စိတ်တိုင်းကျစာဖတ်ခွင့်မရကြပါဘူး။  စာအုပ်တော်တော်များများကို ဗီရိုတွေထဲမှာ သော့ခတ်သိမ်းထားပြီးတော့ စားပွဲပေါ်မှာ ကာတွန်းလေး၊ ရုပ်ပြလေး၊ စာစောင်လေး အနည်းငယ်ကိုပဲ ထားပေးပါတယ်။ ကလေးတွေက ဒီစာအုပ်တွေကိုပဲ ဖတ်ရပါတယ်။ ဗီရိုထဲက စာအုပ်တွေကို ဖတ်ဖို့ မပြောပါနဲ့၊ ဖတ်ချင်လို့ စာကြည့်တိုက်မှူးကို သွားပြောရင်တောင် မရပါဘူး။ အော်ငေါက်လွှတ်တတ်တာပါ။ ဒီတော့ စာကြည့်တိုက်ဆိုတာ နာမည်အတိုင်းပဲ စာအုပ်တွေကို အပြင်ဘက်ကနေ လှမ်းကြည့်ခွင့်ရပြီး ဖတ်ခွင့်မရတဲ့နေရာလိုဖြစ်လာနေပါတယ်။ ကလေးတွေကို စာအုပ်ပေးမဖတ်ရတဲ့အကြောင်းအရင်းကို မေးကြည့်တဲ့အခါကျတော့လည်း စာအုပ်တွေ စုတ်ပြဲပျက်စီးကုန်မှာမို့ပါတဲ့။ ကျွန်တော်ပြောချင်တာက စာအုပ်တစ်အုပ် စုတ်ပြဲပျက်စီးမသွားဖို့ထက် ကလေးတစ်ယောက်၊ လူငယ်တစ်ယောက်ရဲ့ဘ၀ စုတ်ပြဲပျက်စီးမသွားဖို့က အဆမတန်ပိုအရေးပါတယ်ဆိုတာပါပဲ။ စာအုပ်ပဲ၊ ပြဲမှာပေါ့၊ စုတ်မှာပေါ့၊ ပျက်စီးမှာပေါ့။ တစ်ခါဝယ်ထားပြီးရင် တစ်သက်လုံးအရာမယွင်းဘဲ ရှိနေရမယ်လို့ ဘယ်သူကများ ပြဌာန်းထားပါသလဲ။ ပျက်စီးမှာ၊ စုတ်ပြဲမှာစိုးရင် စာကြည့်တိုက်မှူးက  စနစ်တကျ စည်းကမ်းလေးတွေ သတ်မှတ်ပြီး ကွပ်ကဲရပါမယ်။ စာကြည့်တိုက်မှူးဆိုတာ အလကား ငုတ်တုတ်ထိုင်နေဖို့ ခန့်ထားတာ မဟုတ်တဲ့အတွက် စာဖတ်နေကြတဲ့ ကလေးတွေအပေါ် စနစ်တကျ ကွပ်ကဲပေးရမှာပါ။ စုတ်ပြဲ၊ ပျက်စီးရင် ပြစ်ဒဏ်ပေးတာမျိုး စည်းကမ်းသတ်မှတ်ပြီး ကလေးတွေရဲ့ စာဖတ်ကျင့်ကို အလျဉ်မပြတ် ပျိုးထောင်ပေးရမှာပါ။ ဒါကိုမှ စုတ်ပြဲပျက်စီးတယ်ဆိုရင်လည်း နောက်တစ်အုပ်ထပ်ဝယ်လိုက်ပါ။ စာအုပ်တွေပျက်စီးဆုံးရှုံးမှာဆိုးလို့ ကလေးတွေကို စာဖတ်ခွင့်မပေးတာပါ ဆိုတာကတော့ အရေးမပါတဲ့ အကြောင်းပြချက်လို့မြင်သလို၊ အဲဒီလို ပြုမူကျင့်ကြံနေတဲ့ စာကြည့်တိုက်မှူးနဲ့ တာဝန်ရှိသူတွေဟာ အနာဂတ်ကို သစ်စာဖောက်နေတာလို့ပဲ စွပ်စွဲလိုက်ချင်ပါတယ်။
ကျွန်တော်တို့ မုံရွာတက်ကသိုလ်စာကြည့်တိုက်မှာတော့ စာအုပ်တွေကိုဖတ်ခွင့်ပေးပါတယ်။ ဒါပေမယ့် ဆိုးတာတစ်ခုရှိပါတယ်။ ကျောင်းသားတွေဟာ  စာအုပ်ငှားချင်ရင် ကတ်တလောက်ထဲက စာအုပ်နာမည်တွေကိုဖတ်ပြီးရွေးရပါတယ်။ ရွေးပြီး စာအုပ်ပေါ်က အမှတ်အသားကို ပြောလိုက်မှ စာကြည့်တိုက် ၀န်ထမ်းတွေက စာကြည့်တိုက်အတွင်းဘက်က ဗီရိုတွေထဲမှာ သွားရှာပေးတာပါ။ ဒီနေရာမှာ ကျွန်တောတို့ ကြုံရတာက စာကြည့်တိုက်ဝန်ထမ်းတချို့ရဲ့ ပျင်းရိမှု၊ တာဝန်ကျေပွန်စွာ မဆောင်ရွက်မှုနဲ့ ကျောင်းသားတွေအပေါ် လူလည်ကျမှုတွေပါပဲ။  ကျွန်တော်တို့က ကတ်တလောက်ထဲမှာ စာအုပ်တစ်အုပ်ရှာပြီး ငှားဖို့ ရှာခိုင်းတယ်ဆိုရင် သူတို့က ရှာမပေးချင်တာနဲ့ဘဲ ဒီစာအုပ်က မရှိလောက်တော့ဘူး။ အဲဒီစာအုပ်က ရှာဖို့ မလွယ်ဘူး။ ဒီနေ့မအားသေးလို့ နောက်ရက်ကျ ရှာထားလိုက်မယ်နော် အစရှိသဖြင့် အမျိုးမျိုးအကြောင်းပြပြီး တာဝန်ပျက်ကွက်တတ်ကြပါတယ်။
ကျွန်တော်က ကျွန်တော်တို့ တက်ကသိုလ်ကို ဥပမာပေးလိုက်ပေမယ့် တကယ့်တကယ် အရေးအကြီးဆုံးက အခြေခံပညာစာသင်ကျောင်းတွေပါ။ ကလေးတွေရဲ့ ငယ်စဉ်ဘ၀အချိန်ကာလတွေကို လွှမ်းမိုးထားတဲ့ အခြေခံကျောင်းတွေက ပိုအရေးကြီးပါတယ်။ ချစ်ခင်လေးစားရတဲ့ စာရေးဆရာသင်းရီ ပြောဖူးတဲ့ စကားအတိုင်း ရသစာပေပျောက်ဆုံးရင် လူတွေ ရိုင်းကုန်မှာ ဖြစ်တဲ့အတွက် နှလုံးသားနူးညံ့တဲ့ ကလေးငယ်လေးတွေ တိုးပွားအောင်လို့ အခြေခံပညာကျောင်းတွေဟာ ကလေးတွေရဲ့ စာဖတ်ကျင့်ကို ပျိုးထောင်ပေးနိုင်ဖို့ အတတ်နိုင်ဆုံးနဲ့ အကောင်းဆုံး ကြိုးပမ်းပေးကြရမှာ ဖြစ်ပါတယ်။
ဒါ့အပြင် ပညာရေးဝန်ကြီးဌာနဟာလည်း သူတကာနိုင်ငံတွေလို ပညာသင်ကြားရေးမှာ ဒီစာအုပ် ဒီစာအုပ်တွေကို ဘယ်အတန်းမတက်ခင် ဖတ်ထားရမယ်၊ ဒီစာအုပ်တွေကတော့ ဘယ်နှတန်းကျောင်းသားကျောင်းသူတွေ ဖတ်ကိုဖတ်ရမယ့် စာအုပ်တွေဖြစ်တယ် အစရှိသဖြင့် စာသင်တန်းအလိုက် ဖတ်ရမယ့် စာအုပ်တွေ သတ်မှတ်ပေးထားတာမျိုး၊ သင်ရိုးမှာ ရသ သုတ စာပေတွေကို ထည့်သွင်း ပြဌာန်းတာမျိုးတွေ လုပ်ပေးရပါလိမ့်မယ်။
နောက်ဆုံးအနေနဲ့ ထပ်ပြောချင်ပါတယ်။ အခြေခံပညာ စာသင်ကျောင်းများ ၊ အဆင့်မြင့်ပညာတက်ကသိုလ်များမှာ ကျောင်းစာကြည့်တိုက်များကို တံခါးဖွင့်ထားပေးကြပါ၊ စာအုပ်တွေကို ဖြည့်တင်းပေးထားကြပါ၊ ကလေးတွေကို လွတ်လွတ်လပ်လပ်စာဖတ်ခွင့်ပေးကြပါလို့ မေတ်တာရပ်ခံချင်ပါတယ်။ ကျွန်တော်တို့ နိုင်ငံရဲ့  အနာဂတ်အတွက်၊ ကလေးတွေရဲ့ ဘ၀ရှေ့ရေးအတွက် စာကြည့်တိုက်တွေကို တံခါးဖွင့်ထားပေးကြပါလို့ တောင်းဆို ဟစ်ကြွေးလိုက်ချင်ပါတယ် ခင်ဗျားးးးးးးးးးးး။

ဝေမိုးနိုင်(မုံရွာ)

3 comments:

  1. very good post, excellent post, necessary post for Myanmar.

    ReplyDelete
  2. တကယ်ကို အကျိုးရှိပြီး ကောင်းတဲ့ဆောင်းပါးလေးပါ။ Printed media ပေါ်ရောက်သွားရင် ကောင်းမယ်။

    ReplyDelete
  3. ကျောင်းစာကြည့်တိုက်များကို တံခါးဖွင့်ထားပေးကြပါ၊ စာအုပ်တွေကို ဖြည့်တင်းပေးထားကြပါ၊ ဆိုတာ တကယ်ကို လိုအပ်တဲ့ တောင်းဆိုစကားလေးတွေပါ။

    မြတ် မှတ်မိနေတာ တစ်ခုရှိတယ်။ မြတ်တို့ငါးတန်းတုန်းက ကျောင်းမှာ သင်ကြားမှုသင်ယူမှုအထောက်အကူပြုဖွင့်ပွဲလား လုပ်တော့လေ.. ကျောင်းစာကြည့်တိုက်အမြင်လှအောင်လို့ဆိုပြီး အဘိုးဆီကနေ စာအုပ်တွေကို ဗီရိုက်လိုက် လာငှားခဲ့ကြတာ။ :)

    ReplyDelete