Sunday, September 30, 2012

ရူးသွပ်ရင် ဖြစ်မယ် (တဂ်ပို့စ်)





ကျွန်တော်ငယ်ငယ်တုန်းက ရုပ်ရှင်မင်းသားဖြစ်ချင်ခဲ့တာဗျ။ သဏ္ဍာန်လုပ် သရုပ်တူပေးရတဲ့ သရုပ်ဆောင်မှုအတတ်ပညာကို စိတ်ဝင်စားခဲ့တယ်။ ကိုယ်တိုင် သရုပ်ဆောင်ကြည့်တယ်။  မှန်ရှေ့မှာ ရပ်ကြည့် ငိုမလို ရယ်မလို ယောင်ကာမဲ့လိုက်၊ ချိုပလီ ချိုပလီ မူမူနွဲ့လိုက်နဲ့ အိုက်တင်ကျင့်ခဲ့ဖူးတယ်။ ကျွန်တော်ကြိုက်တဲ့ မင်းသားတွေဖြစ်တဲ့ ကျော်ဟိန်း၊ ၀င်းဦး၊ ဒွေး၊ လွင်မိုးတို့ရဲ့ ဟန်ပန်တွေအတိုင်း စကားပြောကြည့်တယ်။ သူတို့ သရုပ်ဆောင်တဲ့ဇာတ်ကားတွေထဲက ဇာတ်ကွက်ထဲမှာ သူတို့ပြုမူလှုပ်ရှားသွားတဲ့အတိုင်း လိုက်လုပ်ကြည့်တယ်။ သူငယ်ချင်းတွေနဲ့ ကျောင်းမှာ ရုပ်ရှင်ရိုက်တမ်းကစားတယ်။ ကိုယ်က မင်းသားဖြစ်လိုက်၊ မင်းသမီးဖြစ်လိုက်၊ ဇာတ်ပို့ဇာတ်ရံဖြစ်လိုက်၊ ဒါရိုက်တာဖြစ်လိုက်၊ ထုတ်လုပ်သူဖြစ်လိုက်နဲ့ ကလေးသဘာဝ စိတ်ကြည်နူးရာ ပျော်ပျော်ရွှင်ရွှင် ကစားခဲ့ကြတယ်။ ဟုတ်သော်ရှိ၊ မဟုတ်သော်ရှိ ငါများ မင်းသားဖြစ်လာလေမလားရယ်လို့  ခပ်ကြောင်ကြောင် လျှောက်လုပ်ခဲ့တာလေးတွေပေါ့။ တကယ်တမ်း စိတ်ထဲက နှစ်နှစ်ကာကာ ၀ါသနာပါတာမျိုး၊ သဘောကျနှစ်ခြိုက်မိတာမျိုးမဟုတ်တော့ နောက်ပိုင်း ပြီးပြီးပျောက်ပျောက်ပဲ ရုပ်ရှင်ကြည့်ရတာလောက်၊ အကယ်ဒမီဆု ခန့်မှန်းရတာလောက်ပဲ စိတ်ပါတော့တယ်။

 နောက်ပိုင်း ပန်းချီဆွဲတာလေးက ကိုယ့် အာရုံကျက်စားရာ ဖြစ်လာပြန်ပါတယ်။ တကယ်တော့ ပန်းချီဆွဲချင်တဲ့စိတ်က မေမေ့ဆီက မြစ်ဖျားခံတယ်လို့ ဆိုရမယ်။ မေမေက ပန်းချီဆွဲကောင်းသူတစ်ယောက်ပါ။ သူ့ဘ၀မှာ တစ်ကြိမ်တစ်ခါမှ ပန်းချီဆွဲ မသင်ခဲ့ရဖူးပါဘူး။ ဘယ် ပန်းချီ ပညာကိုမှလည်း လေ့လာဆည်းပူးခဲ့ခြင်းမရှိပါဘူး။ ဒါပေမယ့် မေမေဆွဲလိုက်တဲ့ပန်းချီပုံတွေက ပန်းချီဆရာတွေ နီးပါးပါပဲ။ ငယ်စဉ်က မေမေပန်းချီဆွဲရင်  အိမ်က အဖေနဲ့ အကိုတွေက  ချောင်တစ်ချောင်မှာ ပိတ်ရိုက်တတ်တယ်လို့တောင် ပြောဖူးပါတယ်။ မေမေကလည်း ဗလာစာအုပ်နောက်ကျောတွေမှာဆွဲထားတာဆိုရင်  စာအုပ်က ရေးစရာစာမျက်နှာသိပ်မကျန်တော့တဲ့အထိဆွဲတာတဲ့။ နောက် ရေနံချေးဝအောင်သုတ်ထားတဲ့အိမ်နံရံမှာ  တုတ်တစ်ချောင်းနဲ့ ဆွဲတယ်တဲ့။ သမံတလင်းပေါ်မှာ မီးသွေးခဲနဲ့ဆွဲတယ်တဲ့။ ဘယ်မှာမှ ဆွဲမရတော့ မြေကြီးကို ပြောင်သလင်းခါနေအောင်လှဲပြီး တုတ်တစ်ချောင်းနဲ့ စိတ်ကူးတည့်ရာပုံတွေကို လျှောက်ဆွဲတတ်တယ်တဲ့။ ပါရမီပါတဲ့အပြင်ကို ဒီလို ၀ါသနာကြီးကြီးနဲ့ဆွဲလာခဲ့တော့မေမေ့ပန်းချီလက်ရာကို တချို့က ဘယ်သူနဲ့မှ မသင်ခဲ့ရဘဲ ဆွဲတတ်တယ်လို့ မယုံကြပါဘူး။  ကျွန်တော်က မေမေ အလုပ်က စိတ်အေးလက်အေးရှိလို့  ပန်းချီလေးများဆွဲပြီဆိုရင် ဘေးနားကနေထိုင်ကြည့်ရင်း ပန်းချီဆွဲချင်စိတ်ပေါက်လာတာပါ။
 ဒီလို နဲ့ မေမေဆွဲတာလေးတွေ ကြည့်ပြီး ပုံကလေးတွေ ဟိုတစ်စ၊ ဒီတစ်စ ဆွဲလာတယ်။ လူပုံတွေဆိုရင် ခြေထောက်အကားကြီးတွေ၊ လက်သိမ်သိမ်လေးတွေ၊ ခေါင်းအကြီးကြီးတွေနဲ့ ဟိုခြစ် ဒီခြစ်ကလေးလက်ရာပေါ့။ အဲဒီလို ဆွဲလာရင်း ဆွဲလာရင်းကနေ သုံးတန်းကျောင်းသားဘ၀မှာ ပန်းချီပုံရယ်လို့ ပီပီပြင်ပြင်ဆွဲနိုင်လာတယ်။ လူပုံ တိတိပပ ရေးတတ်လာတယ်။ ဆေးကလေး ဟိုသုတ်၊ ဒီသုတ်လုပ်တတ်လာတယ်။  ဒီကာလတွေတုန်းက ကျွန်တော်တို့ မူလတန်းကျောင်းတွေမှာ ပန်းချီ၊ ကာတွန်း၊  ပိုစတာ ပြိုင်ပွဲတွေကလည်း အင်မတန်ခေတ်စားနေတာပါ။ ဒီတော့ ပြိုင်ပွဲတစ်ခုမှာ ကျွန်တော်ဝင်ပြိုင်ဖြစ်တယ်။ အေအိုင်ဒီအက်စ် တိုက်ဖျက်ရေးအမှတ်တရ ကာတွန်းပြိုင်ပွဲလေး  ကျွန်တော့်အတွေးနဲ့ မေမေ့အတွေးလေးပေါင်းစပ်ပြီး ရေးဖြစ်ခဲ့တဲ့ အဲဒီကာတွန်းလေးဟာ ကံကောင်းထောက်မစွာနဲ့ ဒုတိယဆုရခဲ့တယ်။ တစ်ခါမှ ပန်းချီနဲ့ပတ်သတ်ပြီး ဆုရတာမျိုး၊ အသိအမှတ်ပြုခံရတာမျိုးလည်း မရှိခဲ့ဖူးတော့ အားတွေတက်တာပေါ့။ ဆက်ဆွဲမယ်၊ မေမေ ဆေးတွေ ၀ယ်ပေး၊ နောက်ပြိုင်ပွဲတွေ ထပ်ပြိုင်ဦးမယ်ပေါ့။
 
ဒီလိုနဲ့ပဲ ပြိုင်ပွဲရှိတိုင်း ၀င်ဝင်နွှဲဖြစ်ရင်း ဆုရတဲ့ပွဲတွေလည်းရှိ၊ မရတဲ့ပွဲတွေလည်းရှိပေါ့။ ဒါပေမယ့် ကျွန်တော့် ပန်းချီဆွဲတဲ့လက်ရာကတော့ တိုးတက်လာသင့်သလောက် မတိုးတက်လာပါဘူး။ လုံးဝမတိုးတက်တာတော့မဟုတ်ဘူး။ ဒါပေမယ့် ဆွဲနေတဲ့ ကာလနဲ့ ယှဉ်ကြည့်ရင် ကျွန်တော့် ပန်းချီအတတ်ပညာဟာ သိပ်ထူးခြားမလာခဲ့ဘူး။ ဆုတွေတော့ ရခဲ့တာပဲ။ ဒါပေမယ့်  အတွေးလေးတွေက အသင့်အတင့် အဆင်ပြေတော့ ဆုလေးတွေ ချိတ်ချိတ်နေခဲ့တယ်။ ခြောက်တန်းနှစ်မှာ ဆရာ တစ်ဦးနဲ့တွေ့ရပြန်ပါတယ်။ အဲဒီဆရာက ဘက်စုံထူးချွန်သူပါ။ ပန်းချီ။ ကာတွန်း၊ ပိုစတာ၊ ကဗျာ၊ သီချင်း၊ ဆောင်းပါး၊ ကွန်ပျူတာပန်းချီ၊ တွေအပြင် ကျောင်းဘင်ခရာအတွက် သီချင်းသံစဉ်ရှာတာမျိုးအထိကို ရေလည်နှံ့စပ်တဲ့ဆရာပါ။ ဒီတော့ သူ့လမ်းကြောင်းမှုအောက်မှာ ကျွန်တော်ပန်းချီတွေထပ်ဆွဲတယ်။ ဆရာ့အတွေး ချွန်မြမြလေးတွေကြောင့် ပွဲတိုင်းလိုလို ဆုတွေရတယ်။
 
ဒီအချိန်မှာ တချို့ဆုရပန်းချီတွေနဲ့ ယှဉ်လိုက်ရင် ကျွန်တော့်လက်ရာက သိပ်မကောင်းတာကို ကျွန်တော်စပြီး ရိပ်မိလာရတယ်။ နောက်ခုလို ပြိုင်ပွဲရှိတိုင်း ပန်းချီဆွဲပြိုင်လိုက်၊ ဆေးတွေ ခြယ်လိုက်နဲ့ လုပ်နေရတာကို ကျွန်တော် ငြီးငွေ့စပြုလာတယ်။ ဆုချီးမြှင့်ခြင်းခံရတဲ့အခါတိုင်း ကြားရတဲ့ လက်ခုပ်သံတွေကို သာယာသလိုလိုဖြစ်မိပေမယ့် ပန်းချီဆွဲရမှာကို ပျင်းတဲ့စိတ်က ကျွန်တော့်ကို လွှမ်းမိုးလာတယ်။ ခုနစ်တန်းနှစ်ကို ရောက်တဲ့အခါ ကျွန်တော် ပန်းချီသိပ်မဆွဲဖြစ်တော့ဘူး။ ပြိုင်ပွဲတိုင်းလည်း ၀င်မပြိုင်တော့ဘူး။ ဆုတွေလည်း ပြိုင်တဲ့ပွဲတိုင်းမရတော့ဘူး။ မေမေတို့၊ ဆရာကြီးတို့က မချင့်မရဲဖြစ်နေကြပေမယ့် ကျွန်တော်ကတော့ ပန်းချီသိပ်မဆွဲရတော့တာကိုပဲ ကျွန်တော် ပျော်နေခဲ့တော့တာ။  
ဘာကြောင့်ပျော်လာလဲဆိုတော့ စာအုပ်တွေ ဖတ်ခွင့်ရတာကိုး။ ငယ်ငယ်လေးကတည်းက မေမေအလုပ်သွားရင် တစ်ယောက်တည်း ကျန်ခဲ့တဲ့ ကျွန်တော်ဟာ မေမေထားပေးခဲ့တဲ့ ကာတွန်းစာအုပ်ကလေးတွေကတစ်ဆင့် စာဖတ်ကျင့်ရခဲ့ရတယ်
  ခုနစ်တန်းအရွယ်ရောက်တော့ ကျွန်တော် မဂ်ဂဇင်းတွေကို သဲသဲမဲမဲ စဖတ်စပြုနေတဲ့အချိန်။ ဒီ့ရှေ့ပိုင်းမှာ အချစ်၊ ဂမ်ဘီရ၊ ထိတ်လန့်သဲဖို၊ စုံထောက်၊ အက်ရှင်၊ သရဲတစ်ဆေ စုန်း သိုင်း စတဲ့ ပေါ်ပင်စာပေအမျိုးအစားတွေမှာ အချိန်ကြီးပျော်မွေ့ခဲ့သလို၊ ဘ၀သရုပ်ဖော်ရသ၀တ်ထုကောင်းများစွာကိုလည်း တစ်ဆင့်တက် မွေ့လျော်ခဲ့ပြီး မဂ်ဂဇင်းတွေကို စွဲစွဲလမ်းလမ်းဖတ်စပြုလာတဲ့အချိန်ပါ။ 
 အစကတော့ သရုပ်ဖော်ပန်းချီလေးတွေ သဘောတကျကြည့်ရင်းကြည့်ရင်း လှန်လှောဖြစ်ပေမယ့် စာရဲ့ရသကို  နှစ်ခြိုက်စွာ ခံစားတတ်လာတဲ့နောက်ပိုင်း ပန်းချီပုံတွေကို ခရီးသွားဟန်လွှဲလောက်ပဲ ကျွန်တော်  ခံစားဖြစ်တော့တယ်။ ပုံလှလှလေးတစ်ပုံလောက်တွေ့ရင်  ဟာ လှလိုက်တာ၊ သဘောကျလိုက်တာပေါ့။ အချိုးမကျတဲ့ပုံမျိုးတွေ့ရင်လည်း ဟင်  ဘယ်လိုကြီးလဲ၊ ဒီလောက်တော့ ငါတောင်ဆွဲတတ်တာပေါ့  ပေါ့။ ပြောချင်တာက ပန်းချီနဲ့ ကျွန်တော်စိမ်းစပြုလာတယ်။ ပန်းချီကို ကျွန်တော်ကျောခိုင်းလာတယ်။
  
ဒီနောက်ပိုင်းမှာ  စာဖတ်ဝါသနာပါသူတွေ ဖြစ်လေ့ဖြစ်ထရှိတဲ့ ထုံးစံအတိုင်း ကျွန်တော် ၀တ်ထုရေးချင်လာတယ်။ ၀တ်ထုတိုလေးတွေ အများကြီးဖတ်ပြီး ၀တ်ထု ရေးချင်စိတ်ပေါက်လာတယ်။ ဒီတော့ စမ်းရေးကြည့်တယ်။ မဂ်ဂဇင်းတွေကို စမ်းပို့ကြည့်တယ်။ တချို့တိုက်တွေဆို ရောက်မှန်းမရောက်မှန်းမသိဘူး တော်တော်များများကတော့ ကျွန်တော့်ဝတ်ထုလေးတွေကို ပယ်ခဲ့ကြတယ်။ ပယ်မှာပေါ့။ ဆယ့်နှစ်နှစ်၊ ဆယ့်သုံးနှစ်သားတစ်ယောက်ရဲ့ အတွေးအခေါ်နဲ့အရေးအဖွဲ့ဟာ ဘယ်လိုလုပ်ပြီး မဂ်ဂဇင်းတန်းမီမှာလဲ။ ဒီတော့ပယ်တာပေါ့။ ဒီလိုပယ်တော့ အစပိုင်း ကျွန်တော် စိတ်ဓါတ်ကျမိတယ်။ ခုမှ စကြုံဖူးခါစဆိုတော့ စိတ်ပျက်လက်ပျက်လည်း ဖြစ်သွားခဲ့တယ်။ ဒါပေမယ့်  ဂန်ထ၀င်  ၀တ်ထုရေးဆရာကြီး ဆရာ တက်ကသိုလ်ဘုန်းနိုင်ဟာ ပထမဆုးံ ၀တ်ထုတို ပုံနှိပ်ဖော်ပြခြင်းမခံရမီ ၀တ်ထုအပုဒ်ပေါင်း နှစ်ရာ (၂၀၀)တိတိ အပယ်ခံခဲ့ရတယ်ဆိုတာလေးကို ဖတ်ခွင့်ရလိုက်တဲ့နောက် တက်ကသိုလ်ဘုန်းနိုင်တောင် အပုဒ်နှစ်ရာ ပယ်ခံရတာ ငါက ဘာကောင်မို့လို့ ဒီလောက်လေးပယ်ခံရတာနဲ့ စိတ်ဓါတ်ကျနေရတာလဲဆိုပြီး အားတင်းပြီး ၀တ်ထုတွေ၊ ဆောင်းပါးတွေ၊ စာအုပ်စာပေတွေ ဆက်ဖတ်ခဲ့တယ်။ ဆက်ရေးခဲ့တယ်။ ပါတာ၊ မပါတာအပထား ရေးနေဖြစ်တယ်။ ပို့တန်တာလေးလဲပို့၊ တချို့ကိုလည်း သိမ်းထား ပြန်ဖတ် ပြင်ဆင်သင့်တာတွေ ပြင်ဆင်။
 ဒီလို ကြိုးစားရင်း ကြိုးစားရင်းနဲ့ သိပ်မကြာခင်ကာလလေးမှာ ၀တ်ထုတိုတစ်ပုဒ်စတင်ဖော်ပြခံရတယ်။ ကလေးတစ်ယောက်အတွက်  ဘ၀မှာ အပျော်ရွှင်ဆုံးကာလတစ်ခုအဖြစ် အဖြစ် အမြဲအမှတ်တရဖြစ်နေစေခဲ့တယ်။ ဒီနောက်ပိုင်း ဆက်ရေးတယ်။ အားအင်တွေ အပြည့်နဲ့ပေါ့။ ဒါပေမယ့် တစ်ပုဒ်စ၊ နှစ်ပုဒ်စလောက်ပဲ ဖော်ပြခံခဲ့ရပြီး တော်တော်များများက ပုံနှိပ်စာလုံးအဖြစ်ကို ရောက်ရှိမလာခဲ့ဘူး။ ဆယ်တန်းနှစ်ရောက်ပြန်တော့လည်း  တစ်ပုဒ်မှ ဆက်မရေးနိုင်တော့ဘဲ အဆက်တော်တော်ပြတ်သွားပြီး ဆယ်တန်းဖြေပြီးမှ တစ်ကြော့ပြန်ရေးဖြစ်ပါတယ်။ ဒါပေမယ့် ဆယ်တန်းနှစ်အတွင်းမှာ ရတဲ့အချိန်အတွင်း စာဖတ်တဲ့အလေ့အထကို  မပျက်စေခဲ့တာကြောင့် ဆယ်တန်းပြီးပြန်ရေးတဲ့ ၀တ်ထုတွေက ရှစ်တန်း ၊ကိုးတန်းတုန်းက ရေးခဲ့တဲ့ ၀တ်ထုတွေနဲ့ တော်တော်ကွာလာပြီ။ အရေးအသားပိုင်း၊ တင်ပြပုံပိုင်းမှာရော ပိုကောင်းလာပြီ။ ဒါပေမယ့် မဂ်ဂဇင်းတန်းမီဖို့၊ မမီဖို့မှာတော့ on the margin  လိုဖြစ်နေဆဲပါ။ တော်တော်များများရေးဖြစ်သလို တော်တော်များများလည်း အပယ်ခံရပြီး အနည်းအကျဉ်းဖော်ပြခံရစပြုပါတယ်။ ဒီ့နောက်ပိုင်းမှာတော့ ကိုယ့်အနေနဲ့လည်း စွမ်းသမျှ အားထုတ်တာကြောင့် မဂ်ဂဇင်းစာမျက်နှာတချို့မှာ ကျွန်တော့်စာလေးတွေ ပုံနှိပ်ဖော်ပြခံရလာပါတယ်။
အခုဆိုရင် ကိုယ်ကိုယ်တိုင် ကိုယ့်စာအပေါ် အပြည့်အ၀ယုံကြည်စိတ်ချပြီး သဘောတကျ နှစ်ထောင်းအားရဖြစ်ရတဲ့အပြင်  စာပေသမားတချို့ကပါ ကိုယ့်အနုပညာကို ထပ်တူ ဝေမျှခံစားနိုင်ပြီး ရင်ခုန်သံချင်းကာရန်ညှိနိုင်တဲ့ စာအနည်းငယ်ကိုလည်း ဖန်တီးနိုင်စပြုလာပါပြီ ဒီလိုပဲ ပျင်းရိလို့ဖြစ်စေ၊ ရေသာခိုလိုက်လို့ဖြစ်စေ၊ အနုပညာအပေါ်မရိုးမသားစိတ်ထားမိလို့ဖြစ်စေ  အနုပညာမမြောက်တဲ့ ကိုယ်ကိုယ်တိုင် ကိုယ့်ဖန်တီးမှုကို အလုံးစုံ ကျေနပ်အားရခြင်းမရှိတဲ့ စာတချို့ကိုလည်း ဖန်တီးမိနေဆဲဖြစ်နေပါသေးတယ်။ ဒါတွေဟာလည်း တစ်ချိန်မှာ လျော့နည်းပျောက်ကွယ်သွားမယ်လို့ ယုံကြည်မိပါတယ်။ လက်ရှိအခြေအနေမှာတော့ စာပေလောကထဲ ခြေတစ်ချောင်းချလို့ရသွားပြီလို့တော့ သတ်မှတ်နိုင်လာပြီလို့ထင်ပါတယ်။
အဲဒီတော့ ကျွန်တော် ပို့စ်လေးကို နိဂုံးချုပ်ပါတော့မယ်။ ကျွန်တော်ဘာကြောင့် ပန်းချီဘက်မှာ မထူးချွန်ခဲ့တာလဲ။ မထွန်းပေါက်ခဲ့တာလဲ။ ရှင်းပါတယ်။ ကျွန်တော့်မှာ ဒီပန်းချီပညာနဲ့ပတ်သတ်ပြီး ရူးရူးမူးမူးတတ်မြောက်ချင်တဲ့စိတ်၊ သည်းကြီးမဲကြီး သင်ယူလိုတဲ့စိတ် မရှိလို့ပါ။ တခဏတာ အာရုံဝင်စားမှုလေးတင်ပါ။ ဒီတော့ ပညာရပ်နဲ့ပတ်သတ်ပြီးတော့လည်း စနစ်တကျ သင်ယူတာ၊ လေ့လာတာ လေ့ကျင့် အားထုတ်တာမျိုးလည်း မလုပ်ချင်ခဲ့တာပါ။ စာရေးတဲ့ကိစ်စမှာကျတော့ ကျွန်တော့်အစစ်အမှန်ဝါသနာဖြစ်တဲ့အတွက်ကြောင့် လေ့လာသင်ယူမှုကိုလည်း သေသေချာချာ လုပ်ဖြစ်သလို၊ အားထုတ်ဖန်တီးမှုမှာလည်း စိတ်လိုလက်ရ ကြိုးပမ်းဖြစ်ပါတယ်။ တတ်အားသရွေ့ စာတွေဖတ်တယ်။ ၀တ်ထုတိုရေးနည်းတွေလေ့လာတယ်၊ သူများရေးတာတွေဖတ်ပြီး ဂရုတစိုက်လေ့လာသုံးသပ်ပါတယ်။ ပြီးမှ သေချာရေးပါတယ်။ ဒါတောင် လိုအပ်ချက်တွေ အများကြီး အများကြီးရှိနေတုန်းပါ။ ဒါပေမယ့် အမှားတွေ၊ အားနည်းချက်တွေ၊ ချို့ယွင်းချက်တွေ၊ လစ်ဟာမှုတွေကို နည်းပါးသထက် နည်းပါးအောင် တဖြည်းဖြည်း တစ်စတစ်စ လေ့လာသင်ယူ အားထုတ်ကြိုးပမ်းဖန်တီးမှုတွေနဲ့ လုပ်ယူသွားဦးမှာပါ။ ဘာကြောင့်လဲဆိုတော့ ကျွန်တော်က စာရေးခြင်းကို ရူးရူးမူးမူးနှစ်သက်သူတစ်ယောက်မို့လို့ပါ။ ဒါလေးနဲ့ဆက်စပ်ပြီး ကျွန်တော့်ဆရာတစ်ဦးပြောခဲ့ဖူးတဲ့ စကားတစ်ခွန်းကို မျှဝေပေးချင်ပါတယ်။ ဘာလဲဆိုတော့  
 ** မင်းတို့ အလုပ်တစ်ခု လုပ်မယ်ဆိုရင် အဲဒီအလုပ်ကို ကိုယ်က ရူးရူးမူးမူးဖြစ်အောင် ဦးဆုံးလုပ်။ ဒီလို ကိုယ်က ကိုယ်လုပ်ရမယ့်အလုပ်နဲ့ပတ်သတ်ပြီး ရူးသွပ်နေပြီဆိုရင် ဒီအလုပ်အပေါ်မှာ စိတ်ပျက်ညည်းညူတာမျိုးတွေ၊  အားလျော့နောက်ဆုတ်ချင်တာမျိုးတွေ၊ ပျင်းရိငြီးငွေ့တာမျိုးတွေ ဖြစ်လာမှာမဟုတ်ဘဲနဲ့ ထူးချွန်သထက် ထူးချွန်အောင် ကြိုးစားဖြစ်ကြလိမ့်မယ်**  
 လို့ဆိုပါတယ်။ ကျွန်တော်ကတော့ ဆရာ့စကားကို  ထောက်ခံမိပါတယ်။ ကိုယ်တွေ့မဟုတ်ပါလား။ ဒါ့အပြင် ကျွန်တော့်အမြင်ကိုလည်း ထပ်လောင်း ပြောဆိုချင်မိပါတယ်။
ဘာလဲဆိုတော့ အလုပ်တစ်ခုကို ရူးသွပ်အောင် မလုပ်မီ ကိုယ့်ကိုယ်ကိုယ် ပထမဆုံးဆန်းစစ်ရပါလိမ့်မယ်။ ငါ ၀ါသနာပါတာ ဘယ်အလုပ်လဲ။ ငါက ဘာလုပ်ရတာ နှစ်ခြိုက်တာလဲ။ ကိုယ့်ဝါသနာကို သိအောင်ဦးဆုံးလုပ်ရပါလိမ့်မယ်။ ဒီနောက်မှာတော့ ဒီဝါသနာကို အကောင်အထည်ဖော်ဖို့ ဖြစ်နိုင်၊ မဖြစ်နိုင် စဉ်းစားရပါမယ်။ ဒီအလုပ်ဟာ လုပ်သင့်သလား၊ မလုပ်သင့်ဘဲ ငါ့ဘာသာ စိတ်ဆန်ဒတွေ ပြင်းပြနေတာလား သုံးသပ်ရပါလိမ့်မယ်။ ကိုယ်ဖြစ်ချင်တာကို၊ ကိုယ်လုပ်ချင်တာ ကိုယ်လုပ်သင့်တာကိုအမှန်တကယ် သိပြီး လက်တွေ့လုပ်ဆောင်လာပြီဆိုတဲ့အခါမှာတော့ အလုပ်အပေါ်မှာ ရူးရူးမူးမူးစိတ်ထားရပါမယ်။ ဒီလိုထားလိုက်တဲ့အခါမှာ ဆရာပြောသလို ဒီအလုပ်အပေါ် ငြီးငွေ့တာ၊ စိတ်ပျက်အားလျော့တာမျိုးတွေ ဖြစ်လာတော့မှာ မဟုတ်ပါဘူး။
  
ဒီနေရာမှာ နောက်တစ်ချက်ရှိသေးတာက ဆန်ဒရဲ့နောက်မှာ ထပ်ကြပ်မကွာ ကပ်ပါရမှာက ကြိုးစားအားထုတ်မှုပါ။ ကြိုးစားအားထုတ်မှုမပါဘဲ ဆန်ဒတစ်ခုထဲနဲ့တင် ကိုယ့်အိပ်မက်တွေပြည့်ဝမလာနိုင်တာကိုတော့ သတိချပ်စေချင်ပါတယ်။ ဆန်ဒါဓိပတိဆိုတဲ့ ဆန်ဒသာလျှင် အကြီးအမှူးဖြစ်သည်ဆိုတဲ့စကားထဲက ဆန်ဒဆိုတဲ့ စကားလုံးအနှစ်သာရထဲမှာ ကြိုးကုတ်အားထုတ်မှုပါ တစ်ပေါင်းတည်းပါဝင်ပြီးသားဆိုတာကိုပါ နားလည်ထားစေချင်ပါတယ်။ ကျွန်တော်တို့တွေကတစ်ခါတစ်ရံမှာ ဖြစ်ချင်တာပဲသိပြီး ကိုယ့်ဘက်က ပေးဆပ်မှုပြုရမှာကိုတော့ တွန့်ဆုတ်၊တွေဝေ၊ နှမျော၊ မေ့လျော့ နေတတ်ကြပါတယ်။
အားလုံးသိကြတဲ့အတိုင်းပါပဲ။ ဘယ်အရာမှ အလကားမရပါဘူး ကိုယ့်ဆန်ဒတစ်ခုပြည့်ဝဖို့၊ ကိုယ့်စိတ်ကူးတစ်ခု အကောင်အထည်ပေါ်လာဖို့၊ ကိုယ်ဖြစ်ချင်တာဖြစ်ခွင့်ရဖို့၊ ကိုယ်လုပ်ချင်တာ လုပ်ခွင့်ရဖို့ ကိုယ့်ဖက်က ထိုက်တန်တဲ့ တစ်စုံတစ်ရာကိုတော့ ပေးဆပ်ရစမြဲပါ ပေးဆပ်မှုတစ်စုံတစ်ရာမရှိဘဲ စိုင်ကော်လို့ ခြုံပေါ်ရောက်တာမျိုးတွေ၊ ကြက်ကန်း ဆန်အိုးတိုးတာမျိုးတွေ၊ ရေသာခိုအချောင်ခိုပြီး ဖြတ်လမ်းကလိုက်တာမျိုး၊ မသန့်ရှင်းတဲ့၊ တရားမမျှတတဲ့နည်းလမ်းနဲ့ ကိုယ်ဖြစ်ချင်တာဖြစ်အောင်လုပ်သွားတာမျိုးတွေကို အားကျစိတ် မ၀င်စေချင်ပါ။ ကိုယ့်အရည်အချင်းကြောင့် ထိုက်ထိုက်တန်တန်ရလာတဲ့ နေရာလေးတစ်ခုကိုပဲ မြတ်နိုးစုံမက်တတ်ပြီး ရိုးသားစွာတက်လမ်းရှာသင့်ပါတယ်။
 
ကိုယ်ကသာ အမှန်တကယ်ရူးသွပ်တယ်ဆိုရင် အမှန်တကယ် ကြိုးစားအားထုတ်တယ်ဆိုရင် ဘယ်အရာကိစ်စမျိုးမဆို ဘယ်အလုပ်မျိုး မဆို၊  ဖြစ်မလာစရာ၊ မအောင်မြင်စရာ၊ အကြောင်းမရှိဘူးလို့ပဲ ကျွန်တော့်တစ်ဦးတည်းအမြင်နဲ့ ဆိုလိုက်ချင်ပါတယ်ခင်ဗျား။                 
ဝေမိုးနိုင်(မုံရွာ)
ဒီအကြောင်းအရာလေးကို ကျွန်တော် တဂ်ပို့စ်လုပ်လိုက်ပါတယ်။ ဒါကြောင့်  ရူးသွပ်ရင်ဖြစ်မယ်
ဆိုတဲ့အပေါ် ဘလော့ဂ်ဂါ ညီအစ်ကို မောင်နှမတွေရဲ့ အမြင်တွေကို ကျွန်တော် နဲ့တကွ စာဖတ်သူများ ဖတ်ရှုနိုင်အောင်  ရေးသားဖို့ အခြေအနေပေးနိုင်မယ်ထင်တဲ့ အောက်ဖော်ပြပါဘလော့ဂ်ဂါများကို တဂ်လိုက်ပါတယ်။  ရေးသားပေးကြလိမ့်မယ်လို့ မျှော်လင့်ပါတယ်ခင်ဗျာ။ 
၁။ အန်တီတင့်
၂။ လွင်ပြင်လှိုင်းငယ်
၃။ ထော်ဦး(ဘားအံကွန်ပျူတာ)
၎။ နွေလ
၅။ ပျိုးယုဝသုန်
၆။ သဒ်ဒါလှိုင်း
၇။ မြတ်ပန်းနွယ်
၈။ စန်းထွန်း
၉။ ဂျွန်မိုး
၁၀။ လရိပ်အိမ်
၁၁။ မိုးနတ်ကြယ်စင်
၁၂။ မိုးညချမ်း


တောင်းပန်လွှာ
စာမေးပွဲကိစ်စရယ်၊ သတင်းလိုက်နေရတာတွေရယ်ကြောင့် ကျွန်တော့်ဘလော့ဂ်လေးမှာ တစ်လလုံးလုံး
ပို့စ်အသစ်ရယ်လို့ မတင်နိုင်ခဲ့တဲ့အတွက် စာဖတ်သူများကို အနူးအညွတ်တောင်းပန်ပါတယ်။  

ရှေ့လျှောက် ပို့စ်အသစ်လေးတွေ အလျဉ်မပြတ် တင်နိုင်အောင် ကြိုးစားသွားပါ့မယ်ခင်ဗျား။

3 comments:

  1. မောင်ဝေမိုးနိုင်ရဲ့ ပို့စ်တွေမတက်မတက်နဲ့ ထင်နေတာ လက်စသပ်တော့ တီတင့်ဆီမှာ up date မဖြစ်တာကိုး။
    စာကြွေးတွေ ရသလောက်ဖတ်သွားတယ်။ ရုပ်ရှင်သရုပ်ဆောင်ကနေ ပန်းချီဆရာ ပြီးတော့ စာရေးဆရာအဖြစ် ဝါသနာလေးတွေ တစ်ခုချင်းပြောင်းလဲလာတယ်ဆိုတာ အချိန်ကာလပေါ်မူတည်ပြီး ရင့်ကျက်လာတဲ့ အသက်အရွယ်၊ ပတ်ဝန်းကျင် အနေအထားတို့နဲ့ သက်ဆိုင်မယ်လို့ ထင်မိတယ်။
    အဆင်ပြေတာနဲ့ တဂ်ပို့စ်လေး တီတင့် ရေးပေးပါ့မယ်နော်း)
    စိတ်ဓာတ်အစဉ်ကြည်လင်အေးမြပါစေကွယ်။

    မေတ္တာဖြင့်
    အန်တီတင့်
    ReplyDelete
  2. တီလေးပြောသလိုပါပဲ ပို့စ်တွေကမတက်လာဘူး။up date မဖြစ်လို့နေလိမ့်မယ်။
    သတိတရ တဂ်လို့ကျေးဇူးတင်ပါတယ်။အချိန်ရတာနဲ့ရေးပေးပါ့မယ်
    ReplyDelete
  3. ရူးသွပ်ရင် ဖြစ်တယ်ဆိုတာ သေချာတာပေါ့
    ကျွန်တော်ဆို အများကြီး ရူးသွပ်တယ်
    ဒါပေမယ့် တစ်ခုတည်း ကြိုးကုတ်အားထုတ်မှု ပြုရသေးတယ်
    ကျန်တာတွေကို တစ်ခုတည်းပြီးမှ တစ်ခုဖြစ်အောင် လုပ်မယ်လို့ ဆုံးဖြတ်ထားတယ်
    ကျွန်တော် ရွတ်ရွတ်နေတဲ့ စာသားတစ်ကြေားရှိတယ် ကိုဝေမိုးနိုင်
    I wanna be a person with many lives !
    ဖြစ်နိုင်မယ်လို့လည်း ယုံကြည်တယ်
    အစ်ကိုနဲ့ ကျွန်တော်နဲ့ အကုန်လုံးတူတယ်ဗျ
    ဖြစ်ချင်တာတွေကို ပြောပါတယ်
    ရေးရင်လည်း ဒါတွေ ပြန်ပါမယ်နဲ့ တူတယ်
    စာရေးအများကြီး ရေးနိုင်ပါစေ
    ReplyDelete

3 comments:

  1. ရူးသွပ်ရင် ဖြစ်မယ် တဲ့။ :)

    သေချာလေး ဖတ်သွားပါတယ်။ မမြတ်လည်း ပန်းချီဝါသနာပါ ဖူးတယ်။ အခုထိလည်း ဟိုခြစ်ဒီခြစ်တော့ ဆွဲဖြစ်ပေမယ့် သေသေချာချာ အချိန်ပေးပြီး မလုပ်ဖြစ်ပါဘူး။ စိတ်လိုလက်ရ စိတ်ပြေလက်ပျောက် သဘောလောက်နဲ့ပဲ ဆွဲဖြစ်တယ်။ သရုပ်ဆောင် လုပ်တာတော့ ဝါသနာ မပါဘူးရယ်။ မှန်ရှေ့မှာ ရပ်ကြည့် ၊ ငိုမလို ရယ်မလို ယောင်ကာမဲ့လိုက်၊ ချိုပလီ ချိုပလီ မူမူနွဲ့လိုက်နဲ့ အိုက်တင်ကျင့်ခဲ့ဖူးတယ် ဆိုလို့ ဘယ်လိုတွေများလုပ်နေမှာပါလိမ့်လို့ မြင်ယောင်ကြည့်သွားတယ်နော်။

    ပြီးတော့ သတိတရ တဂ်ပေးတာ ကျေးဇူးတင်ပါတယ်။ မမြတ် ကြိုးစားပြီး ရေးကြည့်ပြီးရင် လာပြောမယ်နော်။

    ခင်မင်လေးစားလျက်
    မြတ်ပန်းနွယ်

    ReplyDelete

  2. အနုပညာဗီဇဆိုတာ ဒါမျိုးဖြစ်မယ် ဆရာဝေမိုးနိုင်။

    post တွေက အတ်ဒိတ်မဖြစ်လို့မရောက်လာမိဘူး။
    နေကောင်းတဲ့အချိန် ရေးပေးမယ်နော်။

    ReplyDelete
  3. ဆရာရေ..တဂ်ပို့စ်လေးကိုအားတာနဲ့ရေးပေးမယ်နော်...ဟုတ်တယ် ဆရာ့ဆိုက်မှာကွန်မန့်ပေးလို့
    မရတာတော့ အမှန်ပဲ....:(
    ခင်မင်နေတဲ့...မိုးနတ်

    ReplyDelete