Tuesday, August 7, 2012

ပုံနှိပ်မီဒီယာနှင့်အွန်လိုင်းမီဒီယာ အားပြိုင်ဆွေးနွေးပွဲ ဆွေးနွေးချက်များ( ဒုတိယပိုင်း)


ဖူးငုံဆယ်ကျော်သက်မဂ္ဂဇင်း က ကြီးမှူးကျင်းပပြီး စာရေးဆရာမလင်းစက်နွယ်စီစဉ်တင်ဆက်တဲ့ ပုံနှိပ်မီဒီယာနှင့် အွန်လိုင်းမီဒီယာ အားပြိုင်ဆွေးနွေးပွဲ ဆွေးနွေးချက်များ(ဒုတိယပိုင်း) ကိုဆက်လက်တင်ဆက်ပေးလိုက်ပါတယ်။ အခုမှ ဖတ်မယ့်ပရိသတ်များ အချိတ်အဆက်မိအောင် ပထမပိုင်း ကိုသွားဖတ်လို့ရပါတယ်။


ခင်သန္တာ--- ဟုတ်ကဲ့။ ပွဲက အခုမှ စမှာပါ။ ခုမှ counter question တွေမေး၇မှာပါ။ ခုနကပြောသွားတာတွေက  debateဆန်ဆန်  argument ဆန်ဆန်မဟုတ်သေးဘူးပေါ့။  ကိုယ့်အားသာချက်လေးတွေကိုပဲပြောသွားကြတာ။ အားနည်းချက်တွေက ဘာတွေလဲလို့ point out လုပ်တာက အခုမှ စမှာ။ ဘယ်ဘက်ကအရင်စမလဲ။ ပုံနှိပ်ဘက်ကစလိုက်မလား။
ကဲ.... ဒါဆို ဆရာမ ခင်ဆုမြတ်ထွန်း စလိုက်ရအောင်။

ခင်ဆုမြတ်ထွန်း--- ခုနက ဆရာနေဘုန်းလတ်ပြောသွားတာ သတင်းတွေက Speed အရမ်းမြန်တဲ့အတွက် အချိန်နဲ့တပြေးညီ ဖတ်ရတယ်ဆိုတာကတော့ ဟုတ်ပါတယ်၊ ဒါပေမယ့် Citizen Journal သမားတွေက လေ့ကျင့်ထားတဲ့ မီဒီယာသမားတွေ မဟုတ်တာကြောင့် media ethic နဲ့ပတ်သတ်ပြီး ဓာတ်ပုံတွေကို လက်ထဲမှာရှိနေတဲ့ electronic device တွေနဲ့ရိုက်ပြီး အွန်လိုင်းပေါ်တင်မယ်၊ သတင်းဆိုရင်လည်း သတင်းအစစ်မဟုတ်ဘဲ စိတ်ခံစားချက်အတိုင်း တင်လိုက်ကြတယ်ဆိုတော့ အချိန်နဲ့အညီ အမြန်တက်လာတာတော့ မှန်ပေမယ့် နောက်ပိုင်းမှာ ပြည်သူတွေက ဒီသတင်းက မှန်သလား၊  မှားသလားဆိုတာ  မသိနိုင်လို့ သတင်းရဲ့တန်ဘိုးတွေ လျော့လာတယ်၊ ဒါကြောင့် သတင်းတစ်ပုဒ်ရဲ့ ခိုင်မာမှုကို၊ မှန်ကန်မှုကို အွန်လိုင်းက ဘယ်လို ရယူမလဲဆိုတာ သိချင်ပါတယ်



နေဘုန်းလတ်------ကျွန်တော်သိသလောက်တေ့ာမဖော်ပြသင့်တဲ့ ဓာတ်ပုံတွေ ဖော်ပြနေတာ အွန်လိုင်းမှာတင် မဟုတ်ဘူးထင်တယ်
(((((လက်ခုပ်သံများ)))))
ဒီမေးခွန်းက ကောင်းပါတယ်၊ အခုလက်ရှိ ရင်ဆိုင်နေရတဲ့   ပြဿနာပေါ့၊ ခေတ်စနစ် တစ်ခုကနေတစ်ခု ကူးပြောင်းတဲ့ ကာလပေါ်မှာ   ဖြစ်လေ့ဖြစ်ထ ရှိတာမျိုးပါ၊ ကျွန်တော်တို့က အသက်၀၀ရှူခွင့်မရတဲ့အချိန်ကနေ အခုမှ အသက်၀၀ရှူခွင့် ရချိန်မှာ   လေကောင်းလေသန့်တွေချည်းပဲ မျှော်လင့်နေလို့ မရပါဘူး၊
တကယ်တမ်းကျတော့အွန်လိုင်းမီဒီယာက စာဖတ်သူရဲ့ အားအင်ကို ပိုပြီးတော့ တိုးတက်စေတယ်
ကျွန်တော်ပြည်သူတစ်ယောက်အနေနဲ့ပြောရမယ်ဆိုရင် ကျွန်တော် သတင်းတစ်ခု ဖတ်ရင် ဒီသတင်းက မှန်လား မမှန်လား ကျွန်တော့်မှာ ဆုံးဖြတ်နိုင်စွမ်းရှိတယ်၊ အဲ့ဒီတော့ အယ်ဒီတာ အဆင့်ဆင့်ဖြတ်ပြီး၊ နောက် စီစစ်ရေးကြီးကို ဖြတ်ပြီးတော့မှာ ကျွန်တော်တို့က ဖတ်ရမှာလား၊ သူတို့က ဘာလို့ ကျနော်တို့နေရာ ၀င်ပြီး ဆုံးဖြတ်ပေးနေရတာ လဲ၊  ကြားထဲက အဲ့ဒီလို ၀င်ပြီး ဆုံးဖြတ်ပေးနေတယ်ဆိုကတည်းက   ပြည်သူလူထုရဲ့ စွမ်းအင်နိမ့်နေလို့ပဲပေါ့
(((( လက်ခုပ်သံများ )))) 
အဲ့ဒီတော့ ပြည်သူလူထုရဲ့စွမ်းအားတွေ မြင့်လာအောင် အွန်လိုင်းမှာ  ရေးကြပါ၊  ဒါပေမယ့် အခုအချိ်န်မှာ ပြည်သူလူထုကြီးက အမှောင်ထုထဲက လွတ်ကာစမှာ ပြည်သူလူထုက အားနည်းကောင်း အားနည်းပါလိမ့်မယ်၊ လေကောင်းလေသန့်တွေထဲ အမှိုက်သရိုက်တွေ   ရောပါနေတယ်ဆိုပြီးတော့ တံခါးကို ပြန်ပိတ်လိုက်မှာမျိုးကိုတော့ လုံးဝ လက်မခံနိုင်ပါဘူး၊ ပြည်သူလူထုရဲ့ စွမ်းအားတွေ မြင့်လာအောင် အွန်လိုင်းမှာ ရေးကြပါ၊ ဒီစာတွေက အဆိပ်အတောက် ဖြစ်တာတွေလား၊ ဒီသတင်းတွေက မှန်လား မမှန်ဘူးလား၊ ဒါတွေကို  ကျွန်တော်တို့   ပြည်သူတွေ ကိုယ်၌ကိုက ဘာစီစစ်ရေးမှ မလိုပဲ၊  ဘယ်သူကမှ   ဖြတ်တောက် တားဆီးတာ မလိုပဲနဲ့ ကျွန်တော်တို့ ပြည်သူတွေကိုယ်၌် ဖတ်ပြီး ဆုံးဖြတ်တယ်၊ အဲ့ဒီလို ဆုံးဖြတ်နိုင်တဲ့ အစွမ်းအစရှိအောင် ကျွန်တော်တို့ ၀ိုင်းပြီးတော့ ကြိုးစားကြပါ၊ ဒါဟာ ကျနော်တို့ ပြည်သူတွေရဲ့ တာဝန်ပါဘဲ၊ ကျေးဇူးတင်ပါတယ်”
(((( လက်ခုပ်သံများ)))) 

 ခင်သန္တာ---- ဆ၇ာေ၇.... အမှိုက်သရိုက်တွေ မ၀င်အောင်ဆိုတော့ filter တစ်ခုခုခံရမှာပေါ့နော်။ အမှိုက်သရိုက်တွေမ၀င်အောင် ဘယ်လိုခံမလဲ ပြောပါဦး။ တစ်ဖက်ကိုမေးပါဦး

နေဘုန်းလတ် ---- filterခံတယ်ဆိုတာ တခြားတစ်ယောက်က ခံပေးပြီးတော့ ဘာမှ ၀င်လို့မရတဲ့ filterမျိုးကို မလိုချင်ပါဘူး။  ကျွန်တော်တို့ civil society လေးတွေရှိမယ်။ လူဦးရေ population နဲ့ကျွန်တော်တို့ကိုယ်တိုင်  အခိုင်အမာ ထုတ်ပြီးတော့ filterခံမယ်ပေါ့။
နောက်..........ပုံနှိပ်မီဒီယာဘက်ကိုမေးချင်တာက မုန်တိုင်းကကျတော့မယ်။ ဒီအချိန်မှာ မနက်ဖြန်မနက် သတင်းစာကို စောင့်ဖတ်နေရမှာလား။ ဒါဆိုရင် မုန်တိုင်းက လာနေပြီ၊ သတင်းစာက မရောက်သေးဘူး ဖြစ်နေမယ်။
(((((လက်ခုပ်သံများ))))
အဲလို လျင်မြန်မှုရှိရမယ့် သတင်းတွေကို ပြည်သူဆီ အမြန်နှုန်းနဲ့ ရောက်အောင် ပုံနှိပ်မီဒီယာဘက်က ဘယ်လို ကြိုးစားကြမလဲသိချင်ပါတယ်။

ခင်သန္တာ--- ကဲ....ပုံနှိပ်မီဒီယာဘက်က တောက်တဲ့တစ်ကောင်လောက်ရှာပေးရမယ်ထင်တယ်။  အချိန်မီမသိရင်မေးရအောင်......... မိုးလားလေလား။

ခင်ဆုမြတ်ထွန်း--------အခုနောက်ပိုင်းမှာ Breaking Newsတွေအတွက် အွန်လိုင်းနဲ့ Co -Operate လုပ်လာပြီပေါ့နော်၊မဂ္ဂဇင်း၊ဂျာနယ်တွေရဲ့ ၀က်ဆိုက်တွေမှာ အချိန်နဲ့ တစ်ပြေးညီ ဖတ်လို့ရတာပေါ့နော်၊  ဒါပေမယ့် ဆက်လက်ပြီးတော့ Dataတွေကို  တကယ့်ကို Analyse လုပ်တာ၊ တကယ့် အကျိုးအပြစ်တွေကို ဝေဖန် သုံးသပ်တာတွေကိုတော့ အွန်လိုင်းမီဒီယာပိုင်းမှာ ချက်ချင်းမရနိုင်ပါဘူး၊ ဒါတွေကိုတော့ ပုံနှိပ်မီဒီယာမှာ ဖတ်ရမှာပါ၊ ခုနပြောတဲ့ Quality Productsပေါ့
ပုံနှိပ်မီဒီယာဘက်မှ နန်းကြာဖြူ(ဘားအံ)၊ ဝေမိုးနိုင်(မုံရွာ)၊ ခင်ဆုမြတ်ထွန်း

ခင်သန္တာ---------ကဲ.. ဆရာဝေမိုးနိုင် ။ အွန်လိုင်းမီဒီယာကို တစ်ခုခုလေးမေးပေးပါဦး

ဝေမိုးနိုင်---ကျွန်တော် မေးချင်တဲ့ မေးခွန်းမမေးခင်မှာ အကြိုမေးခွန်းတစ်ခု မေးချင်ပါတယ်၊ မီဒီယာက ပြည်သူလူထုကို အလုပ်အကျွေးပြုရမယ် ဆရာဆရာမတို့ လက်ခံပါသလား

နေဘုန်းလတ်------လက်ခံပါတယ်။လက်ခံပါတယ်

ဝေမိုးနိုင်--------------အွန်လိုင်းမီဒီယာက ပြည်သူလူထုကို ဘယ်လောက် အကျိုးပြုနိုင်တယ်လို့ ယူဆပါသလဲ၊ ပြည်သူလူထုဆိုတဲ့ နေရာမှာ အင်တာနက် သုံးနေတဲ့ လက်တစ်ဆုတ်စာ လူတန်းစားကို ပြောတာ မဟုတ်ပါဘူး၊   နိုင်ငံတ၀ှမ်းမှာ ရှိတဲ့    ပြည်သူတွေကို ပြောတာပါ ”
 ((((လက်ခုပ်သံများ)))) 

ခင်သန္တာ------ကဲ.........လှည်းနေလှေအောင်း မြင်းဇောင်းမကျန်တဲ့ ဆရာတို့ေ၇.....ပြည်သူက
နေဘုန်းလတ်--ကျွန်တော်တို့ တိုင်းပြည်ကြီး တစ်သက်လုံး ကွန်နက်ရှင် မကောင်းတော့ဘူးလို့ ယုံကြည်လို့လား
((((((လက်ခုပ်သံများ))))))
ကျွန်တော်တို့ကတစ်သက်လုံးမှောင်မှောင်မည်းမည်းကြီးပဲနေသွားရတော့မှာလား

ဝေမိုးနိုင်---------အဲ့ဒီလိုတော့ မယူဆပါဘူး၊ တစ်ချိန်ချိန်မှာ ကွန်နက်ရှင်   ကောင်းတဲ့ အချိန်တော့ ရောက်လာမှာပါ၊ ဒါပေမယ့် အဲ့ဒီလို ကွန်နက်ရှင်   ကောင်းတယ်ဆိုတိုင်းလဲ တစ်နိုင်ငံလုံးကို ပျံ့နှံ့မယ်ဆိုတာက နည်းနည်းတော့ ခက်ခဲမယ် ထင်ပါတယ်

နေဘုန်းလတ်-----ရှေ့ဆက်သွားရမယ့်လမ်း၊ ကျွန်တော်တို့က အနာဂတ်ကို   မျှော်ပြီး ကြည့်တဲ့အခါမှာ အခုလက်ရှိ အနေအထားလေးကိုပဲ ကြည့်ပြီးတော့ ပြောရင် နည်းနေလိမ့်မယ်၊ လူဦးရေသန်း၆၀မှာ အင်တာနက် သုံးနိုင်သူ သိန်းဂဏန်းလောက်ပဲရှိနေတယ်၊ ဒါက တကယ့် ခက်ခဲတဲ့   ပြဿနာ မဟုတ်ဘူး၊  ကြားက  အတားအဆီးတွေကြားက  ရှိနေလို့သာ တချို့တိုးတက်မှုတွေက  အရမ်းကြီးကြာမှပဲ ဖြစ်လာတော့မယ် ထင်နေကြတာ..”
((((လက်ခုပ်သံများ))))
  တကယ်တမ်းက တစ်နိုင်ငံလုံးအတိုင်းအတာ ကွန်နက်ရှင်ရဖို့၊ တစ်နိုင်ငံလုံး အတိုင်းအတာနဲ့ အင်တာနက်သုံးနိုင်ဖို့၊ တစ်နိုင်ငံလုံးအတိုင်းအတာ သတင်းအချက်အလက် ပျံ့နှံ့ဖို့ကိစ္စက သိပ်ပြီးတော့ မကြာတော့တဲ့ အချိန်အတွင်းမှာ ဒီလို အခြေအနေမျိုးတွေ ဖြစ်လာမယ်လို့ ယုံကြည်တယ်၊ အွန်လိုင်းမီဒီယာဆိုတာ အခုမှ မွေးဖွားကာစအချိန် ရောက်နေတာပါ၊ အဓိကက တဆင့်ပြီးတဆင့် ပြောင်းလဲနေတယ်၊ ကလေးတစ်ယောက်ကို မင်း ငယ်သေးတယ်၊ လိုအပ်ချက် ရှိနေသေးလို့ ရှေ့က ဒီလိုမျိုး ကာထားမယ်ဆိုရင် ကျွန်တော်တို့အတွက် အများကြီး နစ်နာမယ့် သဘောတွေ ရှိတယ်
နာက်.. ခေတ်ရဲ့ပြောင်းလဲမှု၊ ဟိုးအရင်တုန်းက ကျောက်တုံးကြီးတွေ သယ်မပြီး   ကျောက်ချပ်တွေပေါ် ကျောက်စာတွေ ထွင်းရေး၊ နောက် အုတ်ခွက် စာတွေ၊ ပေစာတွေဖြစ်လာ၊ အဲ့ဒီကနေ စာရွက်တွေပေါ်လာပြီး စာရွက်တွေ   ပေါ်မှာရေးကြတယ်၊ ဒါတွေက ကြားခံတွေ သုံးပြီး တစ်ဆင့်ပြီး တစ်ဆင့်   ပြောင်းလဲလာတာပါ၊ ကြားခံဆိုတာ မီဒီယာပါ၊ ကျွန်တော်တို့က ဘာကို သယ်ဆောင်ကြမလဲ၊ စာတွေကို ဆက်လက် ထိန်းသိမ်းမှာလား၊ စာအုပ်တွေကို ဆက်လက် ထိန်းသိမ်းမှာလား… အနှစ်သာရကို ထိန်းသိမ်းမှာလား၊ ပုံသဏ္ဍာန်ကို ထိန်းသိမ်းမှာလား…
(((( လက်ခုပ်သံများ))))
အနှစ်သာရကို ထိမ်းသိမ်းတယ်ဆိုရင် အွန်လိုင်းပေါ်ကနေလဲ အနှစ်သာရရှိတဲ့ စာတွေ ဖတ်နေနိုင်ပါတယ်။ ဦးမင်းလူရဲ့ “အချစ်ဟု အဓိပ္ပါယ် သက်ရောက်ခြင်း မရှိစေရ” ဆိုတဲ့ ၀တ္တုလေးကို ကျွန်တော် မနေ့ညက အွန်လိုင်းပေါ်မှာ ဖတ်ခဲ့ရတယ်၊ အပြင်မှာ ဖတ်သလိုပဲ ခံစားမှုတစ်ခုကတော့ ကျွန်တော်ရခဲ့တာပဲ၊ ဆိုလိုတာက ဘယ်မီဒီယာဖြစ်ဖြစ် မီဒီယာတစ်ခုကို သုံးပြီးတော့ ပြည်သူဆီကို ပို့ဖို့က အဓိကကျပါတယ်၊ ပရင့်မီဒီယာချည်းသုံးမှ စာကောင်းပေကောင်း   ဖြစ်တာမဟုတ်ပါဘူး၊ အွန်လိုင်းမီဒီယာသုံးလဲ စာကောင်းပေကောင်း   ဖြစ်တာပါဘဲ၊ မီဒီယာဆိုတာက အသုံးချတဲ့ ကြားခံပစ္စည်းပဲ၊ ကျွန်တော်တို့ ပြောချင်တာ၊ ခံစားနေတာ၊ အနုပညာတွေကို ပြည်သူ လက်ထဲရောက်အောင် လုပ်ဖို့က ပိုအရေးကြီးပါတယ် 

ခင်သန္တာ---- ဆရာ.......ကျောက်စာတွေ၊ဘာတွေနဲ့  ဒါပေမယ့်ဆရာ...Tablet ဆိုပြီး ကျောက်သင်ပုန်းတော့ပြန်သုံးမနေနဲ့ဦးနော်...

နန်းကြာဖြူ---ဆရာ တစ်ခုလောက်မေးလို့ရမလား
ဒီကျောက်စာတွေ အုတ်ခွက်တွေက ကျွန်မ စဉ်းစားတယ်......သူက နှစ်တွေ ကြာတဲ့အခါမှာ  သူ့ရဲ့တန်ဖိုးက မြင့်တက်လာတယ်။ စာကအရေးကြီးတယ်ဆိုတာမှန်ပါတယ်။ ဒါပေမယ့် သူ့အနေအထားကလဲ ခေတ်တွေကြာတဲ့အခါ ရှေးဟောင်းပစ္စည်းတွေဆိုပြီး တန်ဖိုးတွေမြင့်တက်လာတယ်။  ဖန်သားပြင်က စာတွေကေ၇ာ....... အဲလို အနေအထားမျိုးရှိနိုင်ပါ့မလား...

((((((((((((((လက်ခုပ်သံများ)))))))))))))))))))

သူရဿဝါ------- အဟဲ.....(ခေါင်းကုတ်လျက်)
(((((လက်ခုပ်သံများ)))))
ကျွန်တော် စင်အောက်မှာတည်းက ဆရာမနန်းကြာဖြူနဲ့ညှိနေတာ ..။ ကျွန်တော့်ကို တစ်ခုခုအခက်အခဲဖြစ်အောင်လုပ်ရင် ကျွန်တော် မျက်လုံးပြူးပြီးအံကြိတ်ပြမယ်လို့...။ 

ခင်သန္တာ----ကျွန်မ ကြားဖြတ်ပြောလိုက်ဦးမယ်။ ကျွန်မတို့ ဆရာမြေမှုန်လွင့်ကိုခေါ်မှထင်တယ်နော်..။ ကျောက်စာကိုခဲဖျက်နဲ့ဖျက်လို့မရဆိုတော့လေ

သူရ-------ဆရာမပြောသလိုပေါ့      ပုံနှိပ်မီဒီယာမှာ စာတွေက တန်ဘိုးရှိတဲ့စာတွေ ဖြစ်လာကြတယ်၊ ဘာလို့ ဖြစ်လာကြလဲ၊ ရေးလို့ ဖြစ်လာကြတာ၊  အွန်လိုင်းမှာက အခုမှ စရေးကြတယ်၊ ပရင့်နဲ့ အွန်လိုင်း သက်တမ်းက အများကြီးကို ကွာဟနေတယ်၊ ကွန်နက်ရှင်အခက်အခဲ၊ မီးအခက်အခဲတွေ ကြားထဲက အခုလိုမျိုး ဆရာမတို့ ပုံနှိပ်သမားတွေနဲ့ မျက်နှာချင်းဆိုင် ထိုင် ဆွေးနွေးခွင့်၇လာတယ်ဆိုကတည်းက ကျွန်တော်တို့ ဘယ်လောက်ကြိုးစားခဲ့ရသလဲဆိုတာ သိနိုင်ပါတယ်။.အားလုံးလဲသိမယ်ထင်ပါတယ်။
 (((((လက်ခုပ်သံများ))))
ကျွန်တော်တို့လဲတစ်ချိန်မှာ ဆရာမတို့လိုဖြစ်လာမယ်လို့ယုံကြည်ပါတယ်
 
အွန်လိုင်းမီဒီယာဘက်မှ သူရဿဝါ၊ မြသွေးနီ၊ နေဘုန်းလတ်

နေဘုန်း----- တန်ဘိုးက ၂မျိုးရှိပါတယ်၊ ကျောက်စာတွေကို တန်ဘိုးထားကြတာ မှန်ပါတယ်၊ ဒါပေမယ့် တချို့တန်ဘိုးတွေက ပြတိုက်ထဲမှာ ထားသင့်တယ်၊ တချို့က မထားသင့်ဘူး၊ ဒီတော့ ကျွန်တော်တို့က ပြတိုက်ထဲမှာ ထားသင့်တဲ့ တန်ဘိုးကို ပြတိုက်ထဲမှာပဲ ထားရပါမယ်၊ အခုအချိန်ထိ ကျောက်ချပ်ကြီးတွေ ရွက်သွားဖို့ဆိုတာ မဖြစ်နိုင်ပါဘူး၊ ဘာက အဓိကကျလဲဆိုတော့ တန်ဖိုးရှိတဲ့ သမိုင်းဝင်စာတွေက ဘယ်မှာရေးရေး ပျောက်ပျက်သွားမှာ မဟုတ်ပါဘူး၊ ဒါက ငြင်းလို့မရပါဘူး၊ အသုံးချမှုအပိုင်းမှာလဲ လျှင်မြန်မှု၊ ပေါ့ပါးမှုစတဲ့ တန်ဘိုးတွေအရ ကျနော်တို့ရဲ့  အွန်လိုင်းမီဒီယာက စာတွေမှာ တန်ဘိုးရှိတဲ့ စာတွေ ရှိနေနိုင်တာပဲ၊ တန်ဖိုးဆိုတာက တစ်ခုကတစ်ခုကို ခြေဖျက်တဲ့ သဘောတရားမျိုး မဟုတ်ဘူး၊ ဟိုဘက်က တန်ဘိုးကလဲ သူ့ဟာသူ ရှိနေမှာပဲ၊ အလားတူ ကျွန်တော်တို့ရဲ့ အွန်လိုင်းက စာပေတွေဟာလဲ တဖြည်းဖြည်းနဲ့ တန်ဖိုးတွေ မြင့်တက်လာမှာပါပဲ

ခင်သန္တာ-----ဟုတ်ကဲ့။ ကျွန်မ ကြားကနေ ပရိသတ်ကြီးကို တစ်ခု အစီရင်ခံချင်ပါတယ်ကျွန်မ ဒီပွဲမှာ facilitator လုပ်မယ်ဆိုတော့ rehearsal သဘောမျိုးလေးလုပ်ချင်တယ်ဆိုပြီး မြန်မာအင်ဒီပဲန်ဒင့် ဂျာနယ်ရုံးခန်းမှာ လုပ်ခဲ့ပါတယ်။ကျွန်မက ဆရာတို့ဆရာမတို့ ကျွန်မကို ပြောမယ့်စကားတွေမပေးတောင် တစ်ဖက်စီကိုမေးမဲ့မေးခွန်းလေးတွေတော့ပေးထားပါလို့။ နှစ်ဖက်လုံးကကျွန်မကို မေးခွန်းပေးထားပါတယ်။ ဒါပေမယ့် သူတို့မေးတဲ့မေးခွန်းတွေမဟုတ်ဘူးရှင့်။ ကျွန်မက ကြားထဲကနေ တကယ်ဘာမှမသိတာပါ။  ကျွန်မလက်ထဲမှာ စာရွက်၇ှိပါတယ်။ မယုံရင်ပရိသတ်ကြီးကိုပြနိုင်ပါတယ်။ အဲဒီမေးခွန်းတွေမေးမထားကြဘူးရှင့်။ တကယ့်ကို စင်ပေါ်မှာလျှပ်တစ်ပြက်တစ်ဖက်နဲ့တစ်ဖက် တိုက်ခိုက်ပြီး မေးခွန်းတွေ မေးနေကြတာပါ။   live ဖြစ်တယ်ဆိုတာပြောချင်တာပါ။ ပြီးရင်ကျွန်မ ပရိသတ်ကြီးကို စာရွက်ဝေလို့ရပါတယ်။ တကယ့် ကို live ပါ။
(((((လက်ခုပ်သံများ))))))

ဆုမြတ်----------ကြားဖြတ်တစ်ခုလောက်ပြောချင်ပါတယ်။ ပုံနှိပ်မီဒီယာမှသာ စာကောင်းပေကောင်း ၊စာကြီးပေကြီး မဟုတ်ဘူးလို့ဆရာနေဘုန်းလတ်ပြောသွားပါတယ်။  စာပေဆိုရင် ပုံနှိပ်က ကောင်းနိုးရာရာာတွေကို အွန်လိုင်းသမားတွေ ပြန်မျှဝေနေကြရတယ်။ စာအုပ်တွေထဲက စာတွေကို အွန်လိုင်းမှာပြန်ဖော်ပြပြီး ပေါက်နေကြတယ်။  ဆိုတော့ ဆရာမင်းလူလည်း အွန်လိုင်းမှာ တိုက်ရိုက်ရေးတာမဟုတ်ပါဘူး။

ခင်သန္တာ-----ဒါဆို အွန်လိုင်းဘက်က ပရင့်ကိုမေးခွန်းမေး၇တော့မှာပါ။ ကျွန်မကိုပေးမထားတဲ့မေးခွန်းလေးပေါ့ဆရာတို့ရယ်

မြသွေးနီ----- ကျွန်မက စာရေးဝါသနာပါသလို၊ စာဖတ်ဝါသနာပါသူ တစ်ဦးပါ၊  အိမ်မှာ ကျွန်မသား ၁၀နှစ်သားကနေ ကျွန်မအဖေ ၇၆နှစ်အရွယ်အထိ တစ်အိမ်လုံး စာဖတ်ကြပါတယ်၊ စာပေချစ်မြတ်နိုးစိတ် ရှိသူများပါ၊ ကျမကိုယ်တိုင် စာတွေကို အွန်လိုင်းမှာရော ပုံနှိပ်မှာပါ နှစ်နှစ်သက်သက် ဖတ်ပါတယ်၊ အဲ့ဒီမှာ ကျွန်မ စိတ်မကောင်းစရာတစ်ခု သွားတွေ့တယ်၊ ကျွန်မတို့ အိမ်နားမှာ စာပေ ချစ်မြတ်နိုးတဲ့ မိသားစုဖွင့်ထားတဲ့ စာအုပ်အငှားဆိုင်လေး ရှိတယ်၊ အဲ့ဒီမှာ ကျွန်မ အမြဲ စာအုပ်ငှားဖတ်တယ်၊ အဲ့ဒီဆိုင်မှာ ဂန္တ၀င်စာအုပ်တွေ၊ စာရေးဆရာကြီး ဆရာမကြီးများရဲ့ တန်ဘိုးရှိတဲ့ စာအုပ်တွေကို ဟိုး အခန်းရဲ့ အတွင်းပိုင်းမှာ ထားတယ်၊ အရှေ့မျက်နှာစာမှာတော့ ခေတ်ပေါ်စာပေ၊ အပျော်ဖတ် ဆူလွယ်နတ်လွယ်စာပေတွေ ထားတယ်၊ ဒီဆိုင်မှာ ဖတ်နေကြဆိုတော့ တစ်နေ့ ကျမ မေးမိတယ်၊ စာဖတ်သူ အခြေအနေ ဘယ်လိုရှိလဲဆိုတော့ အခြေအနေ မကောင်းဘူးတဲ့၊ တကယ့် စာဖတ်သူ မရှိဘူးတဲ့၊ ခေတ်ရဲ့ လိုအပ်ချက်ပဲ ပြောမလား၊ လူငယ်တွေက စာဖတ်အား နည်းသွားကြပြီ၊ အရုပ်များများ အရောင်များများနဲ့ စာအုပ်တွေငှားပြီး အရုပ်တွေပဲ ကြည့်ချင်ကြတော့တယ်၊ ဒီတော့ ကျွန်မမေးချင်တာက အွန်လိုင်းမပေါ်ခင်ထဲက အခြေခိုင်ခဲ့တဲ့ ပရင့်မီဒီယာမှာ တန်ဘိုးရှိတဲ့ ဆရာဆရာမကြီးများရဲ့ ရသစာပေတွေထက် ဘာလို့ အပျော်ဖတ်စာပေတွေ ကြီးစိုးနေပါသလဲ

နန်းကြာဖြူ-------ဆရာမပြောတာက အဓိက စာဖတ်ခြင်း အားနည်းတာပါ၊ ကျွန်မလည်းဆရာမလို စာအုပ်ဆိုင်သွားလေ့လာဖူးပါတယ်။ တကယ်တော့ဒါကပုံနှိပ်နဲ့လည်းမသက်ဆိုင်သလို အွန်လိုင်းနဲ့လည်း မသက်ဆိုင်ဘူးရှင့်။  ဒီနေ့   ခေတ်လူငယ်တွေက စာအုပ်တွေထက် ဂျာနယ်တွေ ဖတ်ကြတယ်၊ ဂျာနယ်ဆိုင် သွားလေ့လာတော့လည်း ဂျာနယ်တောင်မှ ရုပ်ပုံများတဲ့ ဂျာနယ်တွေ ဖတ်လာတယ်၊ အဓိက စာဖတ်အား နည်းလာကြတယ်။ ဒီတော့ သူတို့ အွန်လိုင်းမှာလဲစာမဖတ်ကြတော့ဘူး။ ဂျီတော့ခ်၊ ချက်တင်တို့ပဲထိုင်တော့မယ်။ပုံနှိပ်မှာတောင် စာမဖတ်တော့တဲ့အချိန်မှာ အွန်လိုင်းမှာလဲ မဖတ်ကြတော့ဘူးရှင့် 

မြသွေးနီ------ဒါဆိုရင် ကျွန်မတစ်ခု သိချင်တယ်၊ အွန်လိုင်းစာပေက လက်တစ်ဆုတ်စာ အွန်လိုင်း အသုံးပြုသူများအတွက်ပဲ၊ ပုံနှိပ်စာပေကတော့ တစ်ပြည်လုံးမှာရှိတဲ့   အောက်ခြေလူတန်းစားအထိ ပျံ့နှံ့တယ်လို့ အရှေ့မှာလည်း ပြောသွားတယ်၊   ပြည်သူကို အောက်ခြေအထိ အကျိုးပြုတယ်ဆိုရင် မြန်မာပြည်က Best Seller တစ်ယောက်ရဲ့ စာအုပ်ဟာ ဘာလို့ လူဦးရေသန်း၆၀အတွက် အများဆုံးအုပ်ရေ ၅၀၀၀လောက်ပဲ ထုတ်နိုင်ရတာလဲ 
(((( လက်ခုပ်သံများ))))
 
  ဝေမိုးနိုင်--------အဲဒါက ခေတ်စနစ်နဲ့ဆိုင်တယ်လို့ထင်ပါတယ်။ လွန်ခဲ့တဲ့နှစ် ၅၀ ၊၆၀ လောက်ကတည်းက လူတွေကို အမှောင်ချထားပြီး  စာအုပ်စာပေမှာပျော်မွေ့တဲ့နှလုံးသားမရှိအောင်လုပ်ထားတဲ့အတွက်ကြောင့်အခုအချိန်မှာ ဒီလို အကျိုးသက်ရောက်နေတယ်လို့ မြင်ပါတယ်။
((((လက်ခုပ်သံများ))))

ခင်သန္တာ---- ဆရာ မစန္ဒာရဲ့ ၀တ္ထုလိုပေါ့။ ကာလနာသာတရားခံပေါ့ 
ကဲ.....ပုံနှိပ်ဘက်က အွန်လိုင်းကို မေးခွန်းလေးတစ်ခုမေးပါဦး

နန်းကြာဖြူ- နောက် အခုက အွန်လိုင်းမှာ သဒ္ဒါအထားအသိုမမှန်တဲ့လူတွေ၊ စာလုံးပေါင်းတောင် မှန်အောင် မပေါင်းတတ်သူတွေက အွန်လိုင်းမှာ စာရေးဆရာလို့ အမည်ခံပြီးစာတွေရေးနေကြတယ် ၊ နောက်ပြီးတော့ မြန်မာမဟုတ်၊ အင်္ဂလိပ်မဟုတ် မြန်းဂလိပ်ဆိုတဲ့ဘာသာစကားကိုလည်း အသုံးပြုနေကြတယ်။ သူတို့ပြောကြတယ်၊ အွန်လိုင်းပေါ်မှာ လူညီလို့ရင်ဤကိုကျွဲ ဖတ်လို့ရပါတယ်တဲ့၊ အဲ့ဒီအရေးအသားတွေကြောင့်    မြန်မာစာ၊ မြန်မာစကား၊မြန်မာစာပေ အဆင့်အတန်း နိမ့်ကျစေတယ်လို့ယူဆပါတယ်။ ဆရာမတို့ဆရာတို့ဘယ်လိုထင်ပါသလဲ..။

ခင်ဆုမြတ်ထွန်း----၊ စာအုပ်ကို ထိန်းသိမ်းတာ မဟုတ်ဘဲ စာပေကို ထိမ်းသိမ်းမှာ ဆိုတော့လေ
(((လက်ခုပ်သံများ))))

သူရ--------အဲဒါက နှစ်မျိုးနှစ်စားရှိတယ်လို့ထင်ပါတယ်။ ဆရာမပြောချင်တာက မဂ္ဂဇင်းမှာ ရေးနေကြတဲ့သူတွေကကျ စာလုံးပေါင်းမှန်တယ်ပေါ့နော်..။အွန်လိုင်းမီဒီယာမှာ စာလုံးပေါင်းအမှားတွေကို ဂရုစိုက် ရေးကြပါတယ်၊ အဲ့လို ရေးနေပေမယ့် စာလုံးပေါင်းအမှားတွေလဲ ရှိနိုင်ပါတယ်၊ အဲ့လိုပဲ ပုံနှိပ်မီဒီယာမှာလဲ စာလုံးပေါင်းအမှားတွေ ရှိနေတာပါဘဲ၊ အွန်လိုင်းမှာ ကျွန်တော်တို့ ကိုယ်တိုင် ဂရုစိုက် ရေးပါတယ်၊တကယ့်ကို ၀ါသနာအရင်းခံပြီးရေးနေတဲ့သူတွေပေါ့ဆရာမရ ယ်၊ မဂ္ဂဇင်းတွေ စာအုပ်တွေမှာ စာလုံးပေါင်းမှန်တယ်ဆိုတာက ကြားထဲက Proof Readerရဲ့ ကျေးဇူးလား၊ ဒါမှမဟုတ် စာရေးသူက စာလုံးပေါင်း လုံးဝကို မမှားတာမျိုးလား သိချင်ပါတယ် ”
(((( လက်ခုပ်သံများ))))

နန်းကြာဖြူ---- ဆရာက မေးခွန်းလို့ပြောသွားပေမယ့် ကျွန်မက အဲဒါကို အားသာချက်လို့မြင်ပါတယ်။ ကျွန်မတို့မှားတယ်ပဲထားဦး၊ အထက်မှာ ပြုပြင်ပေးမဲ့သူရှိတယ်။  ဆိုတော့ စာမူတွေက ဆန်ကာတင်စစ်ဆေးပြီးမှ ထွက်လာခဲ့ကြရတာဖြစ်ပါတယ်။
((((လက်ခုပ်သံများ)))

နေဘုန်း-----အားသာချက်လို့ ကျနော်က မထင်ဘူး၊ ပိုပြီးတော့တောင် အားနည်း သွားနိုင်သေးတယ်၊ ကိုယ်က အယ်ဒီတာတွေ ရှိလို့ဆိုပြီး  စာလုံးပေါင်းကို ဂရုမစိုက်တော့ပဲ ရေးချင်သလို ရေးလာနိုင်တယ်၊ စာလုံးပေါင်း မှားတယ်ဆိုတာ အွန်လိုင်းပေါ်မှာသာ မဟုတ်ပါဘူး၊ ဆရာလူထုဦးစိန်ဝင်းတောင်မှ သူ့နာမည်ကို လူထုကို ဂျာနယ်တစ်စောင်က ထဆင့်ထူရေးနှစ်ချောင်းငင်နဲ့ ထူတာမျိုး   တွေ့ရသေးတာပဲ၊  ပြောချင်တာက ပရင်မီဒီယာမှာလဲ မှားကြပါတယ်၊   နောက်တစ်ခုက စာဖတ်သူက ပြည်သူပါ၊ စာဖတ်သူက ဆုံးဖြတ်သွား ပါလိမ့်မယ်။ စာဖတ်သူက ဒီလူက ဘာတွေ ရေးနေတယ်ဆိုတာ ဖတ်ပြီးတော့  ဒီလူက ဘာလဲဆိုတာ ကောက်ချက်ချပြီး နေရာပေးနိုင်ပါတယ်၊ ကျွန်တော်တို့   ရေးနေသမျှကပဲ ကျွန်တော်တို့ကိုယ်ကို ကျွန်တော်တို့   ပြဌာန်းနေတာပါဘဲ၊ ပုံနှိပ်ပဲဖြစ်ဖြစ် အွန်လိုင်းဖြစ်ဖြစ် သူရေးနေတဲ့ အရေးအသားပေါ်မှာ သူ့ဟာသူ အကျိုးခံစားရပါလိမ့်မယ်

သူရ---------အခု အွန်လိုင်းမှာဆိုပါတော့.. ကျွန်တော်စာရေးတယ်၊ ကျွန်တော့်စာကို လူ၅၀ဖတ်ပြီးသွားပြီ၊ အဲ့ဒီမှာ တစ်ခုခု အချက်အလက် မှားနေလို့ စာဖတ်သူက Commentမှာ လာပြောတယ်၊ ကျွန်တော်ပြင်လိုက်ရင် ၅၁ယောက်မြောက်က စပြီး အမှန် ဖတ်သွားနိုင်တယ်၊ ဆရာမတို့ ပုံနှိပ်မှာကြတော့ မှားနေရင် ကျွန်တော်တို့လို ချက်ချင်း မပြင်နိုင်ဘူးနော်၊ နောက်တစ်ကြိမ် နောက်တစ်လ ထွက်မှ အမှားပြင်ဆင်ချက် ထည့်နိုင်တယ်နော်၊ အဲဒါနဲ့ပတ်သတ်ပြီးဆရာမအမြင်လေးသိချင်ပါတယ်။
(((လက်ခုပ်သံများ))) 

ခင်သန္တာ---------- ဆရာဝါ...။ ဆရာ ဆရာမ နန်းကြာဖြူကိုပဲမေးချင်တာလား။ ဆရာမကို ပဲ ဆရာဝါ personal attack လုပ်နေတာလားဆရာ

သူရ---------ကျွန်တော် အောက်မှာတည်းက ဆ၇ာမနဲ့ညှိနေတာ

နန်းကြာဖြူ--- ဆရာပြောတာမှန်ပါတယ်။ဆရာတို့ အွန်လိုင်းမှာက ပြင်ရတာ မြန်တာ ဟုတ်ပါတယ်၊ ဒါပေမယ့် ပုံနှိပ်စာမျက်နှာမှာက ရေးတဲ့သူတွေက နောက်ကြောင်းတွေ၊ ရာဇ၀င်တွေ အခိုင်အလုံရှိတယ်၊ ဖန်သားပြင်မှာက   ဘယ်သူဘယ်ဝါဆိုတာကို မသိနိုင်ဘူး၊ကိုယ်ဖျောက်ဝိဇ္ဇာတွေလိုပဲ..။  ဒါကြောင့် ဖတ်သူက တကယ် တန်ဘိုးထား ဖတ်တာလား၊ အပျော်တမ်းဖတ်တာလား မသိနိုင်ဘူး၊ အွန်လိုင်းမှာက လမ်းကြုံလဲ ဖတ်ချင်ဖတ်သွားမှာပေါ့၊ ပုံနှိပ်မှာ ဖတ်တာကတော့ ဒီဆရာကို လေးစားသောအားဖြင့် ဖတ်တာပေါ့၊ အွန်လိုင်းမှာက ဘယ်သူဘယ်ဝါဆိုတာ မသိရဘူး၊ အမှားတွေ ရေးတာလဲ ရှိနေတယ်၊ အွန်လိုင်းမှာ အမှားတွေ ရေးထားရင် ဘယ်သူရေးတယ်ဆိုတာ ရှာလို့မရဘူး၊  အမှားပါလုိ့ ပြောရင် လက်မခံဘူး၊ သူ့ကို ပြင်ဆင် စီစစ်ပေးမယ့်သူမရှိဘူး 

သူရ---အဲ့တာက ကိုယ့်ကိုယ်ကို တာဝန်ယူရပါမယ်၊ ကျွန်တော် ဂျာနယ်အတွက် ဆောင်းပါးတစ်ပုဒ် ရေးတယ်ပေါ့နော်၊အဲ့ဒီမှာ စီစစ်ရေးက မလွတ်တော့ အယ်ဒီတာကို ခေါ်ပြီး ခံဝန်လက်မှတ်ထိုးခိုင်းတယ်၊ အဲ့ဒီတော့ ရေးတာက ကျွန်တော်၊ တာဝန်ယူရတာက အယ်ဒီတာ   ဖြစ်မနေဘူးလား၊ အွန်လိုင်းမှာ မှားရင် ကျွန်တော်တို့ ချက်ချင်း ဝေဖန်ခံရတယ်၊ ကိုယ့်ကိုယ်ကို တာဝန်ယူမှုအပိုင်းကြတော့ ကျွန်တော်တို့က အားသာပါတယ်  

နန်းကြာဖြူ------ကိုယ့်ကိုယ်ကို တာဝန်ယူတယ်ဆိုတာကတော့ မှန်ပါတယ်၊ ဒါပေမယ့် အွန်လိုင်းပေါ်မှာက လူတိုင်းက ကျွန်တော်ဘယ်သူဆိုတာကို မဖော်ပြထားပါဘူး၊ ဆရာတို့ကတော့ ဖော်ပြထားပေမယ့် တခြား မဖော်ပြထားသူတွေ ရှိနေတယ်။ ဘယ်လိုပြောရမလဲ...။ အန္တရာယ်အများဆုံးနေရာက အလုံခြုံဆုံးနေရာဆိုသလိုပဲ အလွတ်လပ်ဆုံးနေရာက အန္တရာယ်အရှိဆုံးနေရာဖြစ်လာနိုင်ပါတယ်။လူတစ်ယောက်က ယဉ်ကျေးမှုနဲ့မလျော်ညီတဲ့ ပုံတစ်ပုံကို တင်လိုက်မယ်၊   မြန်မာလူမျိုးတွေရဲ့ ဂုဏ်သိက္ခာကို ထိခိုက်စေတယ်၊ မြန်မာယဉ်ကျေးမှုနဲ့ မညီတဲ့ ၀တ်စားဆင်ယင်မှုနဲ့၊ တင်တဲ့သူက ဘာရယ်မဟုတ် တင်လိုက်တယ်၊ ဒီပုံတွေကို တိုင်းတပါးက မြင်တဲ့အခါ၊  မြန်မာလူမျိုးတွေရဲ့ သိက္ခာကို ထိပါးစရာဖြစ်တယ်၊ အဲ့ဒီသတင်းမျိုးကို ဘယ်လိုကွန်ထရိုးလုပ်မလဲ 

မြသွေးနီ------ ကျွန်မက ဒါကို ဘယ်လို မြင်သလည်းဆိုတော့ ရေစီးကြောင်းရဲ့ သဘောလို့ မြင်ပါတယ်။  ရေစီးကြောင်းဆိုတာမျိူးက ရပ်တန့်မနေပါဘူး၊ ရေစီးကြောင်းဆိုတာမျိူးက စီးဆင်းနေတာမျိုးပါ၊ ဥပမာပြောရရင် ဟိုးယခင် ကျွန်မတို့ မိဘများရဲ့ လက်ထက်က ရင်ဖုံးလက်ရှည်၊ တစ်ပတ်လျိုဆံထုံးနဲ့ ၀တ်ဆင်ခဲ့ကြတယ်၊ ယနေ့ခေတ်မှာဝတ်စားဆင်ယင်မှုတွေ ပြောင်းလဲလာပါတယ်၊  ခေတ်နဲ့
လျော်ညီစွာ ခေတ်မှီ အ၀တ်အစားများကို ၀တ်ဆင်ကြသလို၊ ခေတ်လွန် သရုပ်ပျက် ၀တ်စားသူတွေလဲ ရှိနေတာပါဘဲ၊ အဲ့ဒီအထဲမှာမှ မြန်မာဝတ်စုံရင်ဖုံး၊ ထမီကို နှစ်နှစ်ခြိုက်ခြိုက် ၀တ်နေသူတွေလည်း ရှိနေပါသေးတယ်
အွန်လိုင်းမီဒီယာဘက်မှ မြသွေးနီနှင့်နေဘုန်းလတ်

 ဆိုလိုချင်တာက အွန်လိုင်းမီဒီယာ ဖွံ့ဖြိုးလာတာနဲ့အမျှ အွန်လိုင်းမီဒီယာ အပေါ်မှာ မှီခိုအားထားအသုံးပြုလာ သူတွေ ရှိလာကြသလို၊ အဲ့ဒီလူများထဲကပဲ ပုံနှိပ်စာမျက်နှာပေါ်များက ရသစာပေ၊ သုတစာပေတွေကိုလည်း တစွဲတလမ်း ဖတ်နေကြသူတွေ ရှိနေကြပြီး၊ စာဖတ်သူတွေ တစ်ခုခုရသွားစေချင်တဲ့ ဆန္ဒနဲ့ ရေးသားနေကြသူ တွေလည်း ရှိနေကြပါတယ်၊ အလားတူ အဲ့ဒီလူတွေထဲမှာလည်း ခုနလို သရုပ်ပျက်အ၀တ်အစား ၀တ်တဲ၊့ ကျင့်ဝတ်နဲ့ မလျော်ညီသူတွေလဲ ရှိနေနိုင်တာပါပဲ
တစ်ဖက်က ပြန်ကြည့်မယ်ဆိုရင်လဲ ဘယ်နေရာမှာမဆို အဆိုးနဲ့ အကောင်းဆိုတာ ဒွန်တွဲနေတတ်တဲ့ သဘောကို ကျွန်မတို့ လက်ခံနိုင်ရပါမယ်။ ဘယ်နေရာမှာမှ အားလုံးကောင်းတယ်၊ အားလုံး မှန်တယ်ဆိုတာ မရှိပါဘူး၊ ပြောရမယ်ဆိုရင် ပုံနှိပ်မီဒီယာမှာလဲ အပျော်ဖတ်စာပေတွေ အများကြီး ကြီးစိုးနေတာပဲ၊ ဒါက ဘာကို ဖော်ပြသလဲဆို အကောင်းနဲ့အဆိုး ဒွန်တွဲနေတာကို ဖော်ပြနေတာပါ၊ ဒါဟာဘာနဲ့တူသလဲဆိုတော့ ခွန်နဲ့အားနဲ့ သဘာဝကျကျ၊ လွတ်လွတ်လပ်လပ် ရေစီးအားကောင်းကောင်း စီးဆင်းနေရမယ့် ရေစီးကြောင်းတစ်ခုမှာ အမှိုက်သရိုက်တွေ ပိတ်ဆို့နေတာနဲ့ တူပါတယ်၊ အခုကာလက ဒီအမှိုက်သရိုက်တွေကိုဖယ်ရှားခါစအချိန်။  အဲ့တော့ အဲ့ဒီ အမှိုက်သရိုက်တွေ  ကျွန်မတို့က ဖယ်ယူရမယ်၊ ဆည်ယူရမယ်၊ ကျွန်မတို့ရဲ့ ဥာဏ်ပညာနဲ့၊ တစ်ဦးချင်းတစ်ယောက်ချင်းစီရဲ့ တာဝန်ယူမှုနဲ့ စစ်ယူရပါမယ်
ကျွန်မဆို အွန်လိုင်းမှာ အလုပ်သဘောအရ အမြဲရှိနေရတယ်၊ အွန်လိုင်းကို သုံးနေရတဲ့အတွက် အွန်လိုင်းမှာ စာကောင်းပေမွန်တွေလည်း အများကြီး   တွေ့တယ်၊ ခုနပြောသလို သရုက်ပျက်တွေ တာဝန်မယူပဲ   ရေးနေတာတွေလည်း တွေ့တယ်၊ ဒီစာတွေ ကျွန်မ အချိန်ပေး မဖတ်ပါဘူး၊ အွန်လိုင်းကို အလုပ်တစ်ဖက်နဲ့ အသုံးပြုရတဲ့အတွက် အချိန်တွေ အများကြီးမပေးနိုင်ဘူး၊ ဒါကြောင့်မို့ ကျွန်မကိုယ်တိုင် တန်ဘိုးထားတဲ့ စာတွေပဲ ရွေးဖတ်ပါတယ်၊ အလားတူ တခြားစာဖတ်သူတွေလည်း သူတို့ရဲ့ စံနဲ့သတ်မှတ်ထားတဲ့ စာတွေပဲ ရွေးချယ်ပြီး ဖတ်သွားကြမယ်လို့ ကျွန်မထင်တယ်၊ အဲ့တော့  အွန်လိုင်းမီဒီယာက အခုမှ စဖွံ့ဖြိုးစအချိန်၊   နောက်ပိုင်းဆို အီလက်ထရောနစ် ဥပဒေတွေ ပေါ်လာလိမ့်မယ်၊  အဲ့ဒီ အခါကြရင် အဲ့ဒီ ပြဿနာတွေကို ထိမ်းချုပ်လာနိုင်မယ်၊ နည်းပါးသွားလိမ့်မယ်လို့ ထင်ပါတယ်၊ ကျေးဇူးတင်ပါတယ်

ခင်သန္တာ---- ဒိုက်တွေ၊သရိုက်တွေ။ အမှိုက်တွေဆိုရင်တော့ ရန်ကုန်မြို့တော် စည်ပင်သာယာရေးကော်မတီတော့အလုပ်ရပြီပေါ့နော်ဆရာမ။



ကဲ....................ဒုတိယပိုင်းကို ဒီလောက်နဲ့ပဲ ဖြတ်ထားပါရစေ။ တတိယပိုင်းမှာ တစ်ဖက်နဲ့တစ်ဖက် beat question တွေနဲ့ ပရိသတ်အမေး၊ ဆွေးနွေးသူမျာအဖြေ တို့ကို တင်ဆက်ပေးသွားမှာဖြစ်ပါတယ်။ ဆက်လက်စောင့်မျှော်ဖတ်ရှုပေးကြဦးမယ်လို့မျှော်လင့်ပါတယ်။ 
 

3 comments:

  1. ဆရာရေ...
    ဆရာမ ခင်သန္ထာ ပြောသွားတဲ့ စကားတွေထဲမှာ
    "ကာလနာသာ တရားခံ"ဆိုတဲ့ စကားကို အရမ်းခိုက်မိ ကြိုက်မိပါတယ်...
    ဆရာတော့ အသံတွေ နားထောင်လိုက် ၊စာတွေ ရိုက်လိုက်နဲ့  တော်တော်ပင်ပန်းနေမှာ ထင်ပါရဲ့...
    htaw oo

    ReplyDelete
  2. ဆရာဝေမိုးနိုင် အခုလို အစအဆုံး အသေးစိတ်တင်ထားပေးတာ ဆွေးနွေးပွဲနေ့ကို ပြန်ရောက်သွားသလို ခံစားလိုက်ရပါတယ်။ နောက်ဆုံးပိုင်းလေးကိုလည်း ဆက်ရေးပါဦးဆရာ..။

    ReplyDelete
  3. ဒီကနေ့စာတွေလာဖတ်ဖြစ်တယ်ဝေမိုးနိုင်ရေ။ အသေးစိတ် ပြည့်ပြည့်စုံစုံရေးထားတာ အားကျစရာ။ ညီမမြသွေးပြောသလို အဲဒီနေ့ရက်လေးကို ပြန်ရောက်သွားသလို ခံစားမိတယ်။ အစအဆုံးပြန်ဖတ်သွားတယ်နော်။
    စိတ်ဓာတ်အစဉ်ကြည်လင်အေးမြပါစေကွယ်။

    မေတ္တာဖြင့်
    အန်တီတင့်

    ReplyDelete