Friday, August 10, 2012

မိမိနှင့်စိမ်းသော နယ်ပယ်များအကြောင်း စာဖတ်ခြင်းဖြင့် ရင်းနှီးနိုင် (လူငယ့်အသံ)

ဖူးငုံဆယ်ကျော်သက်မဂ္ဂဇင်းက ကျင်းပတဲ့ ပုံနှိပ်မီဒီယာနှင့်အွန်လိုင်းမီဒီယာအားပြိုင်ဆွေးနွေးပွဲမှာ ၀င်ရောက်ဆွေးနွေးဖို့ ပြီးခဲ့တဲ့လကုန်ပိုင်းလောက်က ရန်ကုန်သွားရပါတယ်။ ပွဲကျင်းပပြီးနောက်ရက် ဖူးငုံအယ်ဒီတာများက မပြန်ခင်လာခဲ့ကြပါဦးဆိုတာကြောင့် ကျွန်တော်တို့ ပုံနှိပ်မီဒီယာအဖွဲ့သုံးယောက် Myanmar Independent News Journal မြန်မာအင်ဒီပဲန်ဒင့်ဂျာနယ်ရုံးခန်းကို သွားရောက်တွေ့ဆုံခဲ့ကြပါတယ်။ ဆရာမ မသီတာတို့နဲ့ စကားတွေ ပြောနေကြရင်းက မြန်မာအင်ဒီပဲန်ဒင့်ဂျာနယ်သတင်းထောက်(ဖူးငုံဆယ်ကျော်သက်မဂ္ဂဇင်းမှာ စကားဝိုင်းကဏ္ဍကို တာဝန်ယူတင်ဆက်ပေးနေသူ) မတင်တင်အေးက ဝေမိုးနိုင်ကို အင်တာဗျူးမလို့ဆိုတော့ ကျွန်တော့်စိတ်ထဲ လန့်သွားပါတယ်။ ဘာပါလိမ့်ပေါ့။ ပြီးမှ ပွဲအကြောင်းမမေးလိုက်ရလို့များ မေးမလို့လား လို့ တွေးမိပေမယ့် မဟုတ်ပါဘူး။ သြဂုတ်လ၊ ၁၂ရက်နေ့ဟာ အပြည်ပြည်ဆိုင်ရာ လူငယ်များနေ့မို့ အဲဒီနေ့နဲ့ပတ်သတ်ပြီး လူငယ်တစ်ယောက်(ဆယ်ကျော်သက်) ဖြစ်တဲ့ ကျွန်တော့်ကို လူငယ့်အသံကဏ္ဍအတွက် မေးချင်လို့ပါလို့ ဆိုပါတယ်။

ကျွန်တော်က မေးပါလို့ဆိုလိုက်ရပေမယ့် စိတ်ထဲမှာတော့ တဒိန်းဒိန်းနဲ့ လှုပ်ရှားနေပါတယ်။ ဘာတွေများ မေးမှာပါလိမ့်ပေါ့ ။ ကျွန်တော်က စကားသိပ်မပြောတတ်။ ပြောရင်လည်း စိတ်ထဲရှိတဲ့အတိုင်း ဟောဟောဒိုင်းဒိုင်း အားမနာဘဲ ပြောတတ်တော့ လူမုန်းကလည်း သိပ်များတယ် ။ ပြီး ကျွန်တော့်မှာ တင်္ခဏုပ္ပတ္တိ ဥာဏ်မရင့်သန်။ ရုတ်တရက် မေးလာ ပြောလာတာကို ချက်ချင်း ချက်လက်ကျန ပြန်ပြောနိုင်စွမ်းမရှိ။ ဒါကြောင့် မတင်တင်အေးက မေးမယ်ဆိုတော့ ကျွန်တော်လန့်မိတယ်။ ဒါပေမယ့် မတင်တင်အေးက သဘောပေါက်ပုံရပါတယ်။ အေးအေးဆေးဆေးနဲ့ သူမေးချင်တဲ့မေးခွန်းလေးတွေကို မေးသွားတယ်။

မြန်မာအင်ဒီပဲန်ဒင့်ဂျာနယ်မှ လူငယ့်အသံကဏ္ဍ


အဲဒီ အမေးအဖြေတွေကို ၂၀၁၂၊ သြဂုတ်လ၊၉ ရက်နေ့ထုတ် မြန်မာအင်ဒီပဲန်ဒင့် ဂျာနယ်မှာ ဖော်ပြထားပါတယ်။ ဒါကြောင့် ဂျာနယ်မှာဖော်ပြထားတဲ့အတိုင်း ပြန်လည်ဖော်ပြ ပေးလိုက်ပါတယ်။

မိမိနှင့်စိမ်းသော နယ်ပယ်များအကြောင်း စာဖတ်ခြင်းဖြင့် ရင်းနှီးနိုင်

 လူငယ်တို့၏ အခန်းကဏ္ဍကို ပိုမို မီးမောင်းထိုးပြသကဲ့သို့ ဖြစ်ပေါ်စေသော အပြည်ပြည်ဆိုင်ရာလူငယ်များနေ့ဟူသည့်နေ့တစ်နေ့ကို သြဂုတ်လ၁၂ရက်၌ သတ်မှတ်ပေးထားသည် ။ ထိုနေ့ပေါ်ပေါက်လာရခြင်းနှင့်အတူ လက်ရှိ လူငယ်တို့၏ အခန်းကဏ္ဍများ၊ လက်ရှိလူကြီးတို့၏ လူငယ်များအပေါ် အပြုအမူများ၊ လူငယ်များဝိုင်းဝန်းကြိုးပမ်းသင့်ပုံများကို အသက် ၁၃နှစ်အရွယ်မှစ၍ ပုံနှိပ်စာမျက်နှာပေါ်တွင် ၀တ္ထုတိုတစ်ပုဒ်ဖော်ပြခံရပြီး  လက်ရှိတွင် ၀တ္ထုတို၊ဆောင်းပါးများရေးသားလျက်ရှိသော အသက် (၁၇)နှစ်အရွယ် လူငယ်စာရေးဆရာတစ်ဦးဖြစ်သူ ဝေမိုးနိုင်(မုံရွာ)နှင့် မြန်မာအင်ဒီပဲန်ဒင့်တို့တွေ့ဆုံထားသည်များမှ ကောက်နုတ်ဖော်ပြပါသည်။

““““ အပြည်ပြည်ဆိုင်ရာလူငယ်များနေ့ပေါ်လာတာဟာ ကမ္ဘာအရပ်ရပ်ကနေ လူငယ်တွေကို အားကိုးတယ်၊ ယုံကြည်တယ်ဆိုတဲ့ ပြယုဂ်တစ်ခုအနေနဲ့မြင်တဲ့အတွက်ဝမ်းသာပါတယ်။  ပြီးတော့ လူငယ်တွေဟာ နေရာတိုင်းမှာ အပြည့်အ၀လိုအပ်ပါတယ်။  ဘာကြောင့်လဲဆိုတော့  လူကြီးတွေက ဟိုးအရင် လူငယ်ဘ၀ကတည်းက  နေရာတစ်ခုရထားပြီဆိုတော့ ဒီနေရာမှာ အကြာကြီးစွဲနေလို့မရတော့ဘူး။  လူကြီးတွေ ဖယ်ပေးသွား၇မယ့်နေရာတိုင်းကို လူကြီးတွေကပဲ ဆက်ပြီးယူနေမယ်ဆိုရင် သူတို့က လူကြီးအမြင်နဲ့ပဲ ဒီဟာတွေကိုဆက်လုပ်မယ်။ လူကြီးအမြင်ဆိုမှတော့  နည်းနည်းရှေးရိုးစွဲနေပြီပေါ့၊  အဲဒီအတွက် ခေတ်နဲ့အမီလိုက်ဖို့ဆိုတာ ဘယ်လိုမှ မဖြစ်နိုင်တော့ဘူး။  အဲဒီတော့ လူငယ်တွေက ဒီနေရာမှာလိုလာပြီ။ လူငယ်အမြင်ဆိုတော့ ခေတ်အမြင်ရှိတယ်။  လူငယ်စိတ်နဲ့ ဘာမဆို ရဲရဲရင့်ရင့်လုပ်နိုင်တယ်ဆိုတဲ့အခါမှာ ခေတ်နဲ့ပိုပြီး လျော်ညီမှုတွေ ဖြစ်လာမယ်လို့ ကျွန်တော်ထင်ပါတယ်။ ခေတ်မီတဲ့လူကြီးတချို့တော့ရှိတယ်။ ဒါပေမယ့် လူငယ်တွေကို သိပ်ပြီးတော့ နေရာမပေးချင်ကြဘူး။ ကိုယ့်နေရာဖယ်ပေးရတော့မယ်ဆိုတဲ့အခါမှာကျတော့ တွန့်ဆုတ်တတ်ကြတယ်။  အမြဲတမ်းရွေ့နေရမယ်ဆိုတဲ့ သဘောတရားကြီးကို လက်မခံနိုင်ဘူးဖြစ်နေကြတာ၊  အဲဒီလိုနေရာမျိုးမှာ လူငယ်တွေက အကြောင်းအကျိုးကိုသိခြင်းဆိုတဲ့ ပညာတတ်တွေဖြစ်နေမယ်၊ ကမ္ဘာကို ရင်ဘောင်တန်းနိုင်တဲ့ ပညာတွေ တတ်နေမယ်ဆိုရင် နေရာမပေးလို့ကိုမရတော့ဘူး။  ဒါကြောင့်  လူငယ်တွေမှာ အဓိက လိုအပ်တာက ပညာတတ်ဖို့နဲ့ အင်္ဂလိပ်စာတတ်ဖို့လို့ပဲ ကျွန်တော်ယူဆပါတယ်။ လူငယ်တွေမှာအတွေ့အကြုံမ ရင့်ကျက်သေးတာတော့အမှန်ပဲ။ ဒါတွေကို လူကြီးတွေက သင်ပေးရမယ်။ ဒါပေမယ့် အတွေ့အကြုံမရှိသေးတဲ့ လူငယ်တွေအနေနဲ့  စာဖတ်ရင်းကိုယ်မသိတဲ့ နယ်ပယ်လောကကို သိအောင်လုပ်လို့ရတယ်ဆိုတာ ပြောချင်တယ်။ ခုခေတ်မှာ စာအုပ်တွေကလည်း အမျိုးစုံထွက်နေတာဖြစ်တဲ့အတွက်  ကိုယ်သိချင်တဲ့ နယ်ပယ်လောကအကြောင်းကို ကိုယ့်ဘာသာ ကိုယ်ရွေးပြီးဖတ်လို့ရတယ်။  ကိုယ်နဲ့ဘယ်လောက်စိမ်းတဲ့လောကပဲဖြစ်ဖြစ်၊ အဲဒီနယ်ပယ်လောကက ပညာရှင်တွေရေးတဲ့စာပေတွေဖတ်မယ်ဆိုရင် အဲဒီနယ်ပယ်မှာကိုယ်တိုင်ပါဝင်ရသလိုကို ရင်းနှီးသွားနိုင်တယ်။  ဒါပေမဲ့ စာကို သာမန်ဖတ်ရုံနဲ့မရဘူး။ စာဖတ်ခြင်းကို ငယ်ငယ်ကတည်းက ရူးရူးမူးမူးပျိုးထောင်ရမယ်။  ဒါမှ အသိအမြင်တွေ ကြွယ်ဝလာမယ်၊ ဒီလို ကြွယ်ဝလာတဲ့အခါမှာ  လူငယ်တွေအလုပ်လုပ်ဖို့ လမ်းစတွေ မြင်လာမယ်။  ဒီလိုမြင်တဲ့အခါမှာ  လူငယ်စိတ်နဲ့ရဲရဲရင့်ရင့် လုပ်ချင်စိတ်တွေပေါက်လာမယ်။  အမှားအယွင်းတချို့ရှိနိုင်လိမ့်မယ်။ အဲဒီအမှားအယွင်းတွေကနေ သင်ခန်းစာယူပြီးတော့ အောင်မြင်မှုဆီသွားရမယ်။  အခုဆိုရင် ကျွန်တော်တို့ မြန်မာနိုင်ငံဟာ အတန်အသင့်အခွင့်အလမ်းတွေ ပွင့်နေပြီ။  အဲဒီအတွက်လူငယ်တွေရဲ့ အနာဂတ်ဟာ တော်တော်လေး ပွင့်လင်းလာနေပြီ။ လူငယ်တွေအနေနဲ့ အရည်အချင်းတွေ ပြည့်ဝနေဖို့ပဲလိုတယ်လို့ ကျွန်တော်ထင်တယ်။ လူငယ်တွေအနေနဲ့ တစ်ချိန်ချိန်မှာကိုယ်ပြန်ပြီး အသုံးချလို့ရမယ့် တိုင်းပြည်ရဲ့အနာဂတ်အတွက်ပဲဖြစ်ဖြစ်၊ ကိုယ့်ရဲ့ အနာဂတ်အတွက်ပဲ ဖြစ်ဖြစ် အကျိုးရှိစေမယ့် အလုပ်တွေကိုပဲ လုပ်စေချင်တယ်။ တခြားအပျော်အပါးတွေမှာပဲ အချိန်ကုန်မခံစေချင်ဘူးလို့ ကျွန်တော်လူငယ်တစ်ယောက်အနေနဲ့ ပြောချင်ပါတယ်””””””

ဟု လူငယ်တို့ဘက်မှ လူငယ်တစ်ယောက်အနေဖြင့် လူငယ်တို့အတွက် ပြောကြားထားသည်။


No comments:

Post a Comment