Monday, June 11, 2012

ဆရာမောင်သော်က ကွယ်လွန်ခြင်း နှစ်ဆယ့်တစ်နှစ်ပြည့်အလွမ်း အပိုင်း(၂)

 








   

စာရေးဆရာမောင်သော်က (ဗိုလ်မှူးဘသော်)  ၁၉၂၈-၁၉၉၁

                   


 
 အပိုင်း(၁)တုန်းက ကျွန်တော် အစီရင်ခံခဲ့သလိုပဲ။ ခု ဒုတိယပိုင်းမှာ  ဆရာဦးဝင်းငြိမ်းရဲ့ “ ရှိစေချင်တဲ့ ကျွန်တော့်ဦးလေး ” ဆောင်းပါးနဲ့  ဆရာဦးဝင်းငြိမ်းနဲ့ ဆရာမောင်သော်က အင်တာဗျူးကို ဖော်ပြပေးသွားပါမယ်။

ဒီနေရာမှာ ဆောင်းပါးအစအဆုံးဖော်ပြမှာမဟုတ်ဘဲ ဆရာမောင်သော်ကနဲ့ပတ်သတ်တဲ့ အချက်အလက်တွေကိုသာ ကောက်နုတ်ပေးသွားမှာဖြစ်ပါတယ်။

ရှိစေချင်တဲ့ ကျွန်တော့်ဦးလေး -  
 ၀င်းငြိမ်း

...........................ကျွန်တော့်ဦးလေး (ဦး) ဘသော် က တိုက်ရေယာဉ် ၁၀၃ မှာ ဦးစီးတာဝန်ကျစဉ် မြန်မာ့ပင်လယ်ပြင်မှာ သဘောင်္နစ်မြုပ်ခဲ့ပါတယ်။  ပင်လယ်ပြင်မှာ အသက်ကယ်လှေကလေးတစ်စီးနဲ့ သူ့လက်အောက်ခံတပ်မတော်သားများကို အတတ်နိုင်ဆုံး  ဦးစီးကွပ်ကဲပြီး အသက်ရှင်လာခဲ့တဲ့သူဖြစ်ပါတယ်။   တိုက်ရေယာဉ်၁၀၃ ပင်လယ်ပြင်မှာ အဆက်အသွယ်မရဘဲ ပျောက်ဆုံးသွားစဉ် အဲဒီကာလတုန်းက  ကာကွယ်ရေးဦးစီးချုပ်က တောခိုသွားတယ်လို့ ယူဆတာကြောင့် လေယာဉ်များနဲ့ ပင်လယ်ပြင်မှာ လိုက်ရှာပြီး  ပစ်ခတ်နှစ်မြှုပ်ဖို့ အမိန့်ပေးခဲ့တယ်လို့ သိရပါတယ်။ ကံအားလျော်စွာ ပင်လယ်ကူးသဘောင်္တစ်စင်းက တွေ့ရှိပြီး ကယ်တင်ခဲ့တာကြောင့်  တချို့တလေ အသက်ရှင်ခဲ့ကြပါတယ်။


ပင်လယ်ပြင်မှာ သူ မျောနေစဉ် အဒေါ်ဖြစ်သူ ဒေါ်လှရင်က ကိုယ်ဝန်ကြီးနဲ့ပါ။ အဒေါ်ကို အားပေးဖို့အတွက်  မိုးလင်းမိုးချုပ် အမေက အတူသွားနေပေးခဲ့ပါတယ်။  ဦးလေးတို့ကိုကယ်တင်လိုက်နိုင်ပြီလို့ သတင်းရပြီးနောက်မှာပဲ အဒေါ်က သမီးမိန်းကလေးတစ်ဦးကို မွေးဖွားခဲ့ပါတယ်။  ကျွန်တော့်အမေက ပင်လယ်ပြင်မှာမျောနေခဲ့တဲ့ ဦးလေးကို ကယ်တင်နိုင်ခဲ့တဲ့ သမီးအဖြစ်တင်စားပြီး “မေခလာ”လို့ အမည်ပေးခဲ့ပါတယ်။ (အခုတော့ အဲဒီကလေးမ နာမည်က ဒန္တီ လို့ အမည်တွင်နေပါပြီ။)

@@@@@@@

 ဦးလေးက နောင်မှာတာဝန်ရှိသူများက  “ရှေ့သို့”နဲ့ Forward ဂျာနယ်တို့မှာ အယ်ဒီတာချုပ်အဖြစ်တာဝန်ပေးအပ်ခဲ့ပါတယ်။  ဒီဂျာနယ်တွေက ဆိုရှယ်လစ်ခေတ်ဦးမှာ  လှုံ့ဆော်စည်းရုံးရေး ဂျာနယ်များပါပဲ။

တိုက်ရေယာဉ် ၁၀၃နဲ့ပတ်သတ်ပြီး သူဘာမှ မရေးဘဲ ရေငုံနှုတ်ပိတ်နေခဲ့ရာက နှစ်ပေါင်းသုံးဆယ်ကြာမှ ဆရာဦးမြလှိုင်ရဲ့ ပေဖူးလွှာမဂ္ဂဇင်းမှာ အသေးစိတ် ပြန်လည်ရေးဖွဲ့ခဲ့ပါတယ်။  အဲဒီကာလတုန်းက နာမည်ကြီး ကိုယ်တွေ့ဖြစ်ရပ်တစ်ခုအဖြစ် စာဖတ်ပရိသတ်များနှစ်ခြိုက်ခဲ့ကြပြီး လုံးချင်းအဖြစ်လည်း ထုတ်ဝေခဲ့ပါတယ်။ 

၁၉၈၈ခုနှစ် အရေးတော်ပုံကြီး ပေါက်ပေါက်လာတဲ့အခါ ဦးလေးမနေသာဘဲ ပါဝင်လာခဲ့ရပါတယ်။ မိခင်ဖြစ်သူနာမကျန်းဖြစ်တာကို လာရောက်စောင့်ရှောက်နေတဲ့ ဒေါ်အောင်ဆန်းစုကြည်ကို  တရားဟောဖို့ ရန်ကုန်ပြည်သူ့ဆေးရုံကြီးရှေ့မှာ သူကိုယ်တိုင်စီစဉ်ပြီး သူကိုယ်တိုင် ကျွန်တော့်ညီ မျိုးမြင့်ညိမ်းရဲ့ ဂျစ်ကားနဲ့သွားခေါ်ခဲ့ပါတယ်။ ဒီလူထု တရားပွဲဟာ  ဒေါ်အောင်ဆန်းစုကြည်ရဲ့ ပထမဆုံးသော လူထုနဲ့ ထိတွေ့ပွဲဖြစ်ခဲ့ပါတယ်။  

တပ်မတော်(ရေ)က တာဝန်ရှိသူပုဂ္ဂိုလ်ကြီးများကိုလည်း အိတ်ဖွင့်ပေးစာရေးပြီး လူထုနဲ့ပူးပေါင်းဖို့ နားချခဲ့ပါတယ်။  ဒီကိစ္စများကြောင့်  နအဖ အစိုးရအဖွဲ့က တပ်မတော်ကို ဖြိုခွဲရန်ကြံစည်မှုလို့ စွပ်စွဲပြီး ထောင်ချခဲ့ပါတယ်။  အကျဉ်းထောင်အတွင်း မှာ  ကျန်းမာရေးချို့ယွင်းလာပေမယ့် ထိရောက်တဲ့ ဆေးဝါးကုသမှု မရခဲ့ပါဘူး။ 

လူတစ်ယောက်ရဲ့ နောက်ဆုံးအချိန်မှာ သူချစ်တဲ့ ၊ သူခင်တဲ့ အထူးသဖြင့် မိသားစုကိုတော့ တွေ့ချင်မှာမလွဲပါဘူး။  ကျွန်တော့်ဦးလေးကတော့  အခြေအနေမကောင်းတော့တဲ့အချိန်မှာ  ထောင်ကနေ ရန်ကုန်ဆေးရုံကြီးကို ပို့ခဲ့ပေမယ့် မိသားစုကိုတော့ အကြောင်းကြားမပေးခဲ့တာ အခုအချိန်ထိ အသည်းနာစရာကောင်းလှပါတယ်။ (နောက်ဆုံးအချိန်မှာ ဆရာမ မသီတာ၊ စမ်းချောင်း၊ ကတော့ လူနာခန်းထဲဝင်ပြီး စမ်းသပ်သလိုလိုနဲ့ တွေ့ခွင့်ရလိုက်ပါတယ်။ )

ကွယ်လွန်ပြီးတဲ့နောက်မှာ လည်း  မိသားစုမှာ ခင်ပွန်း၊ အဖေ၊ ဦးလေးကို နောက်ဆုံးအဖြစ် ၀အောင်ကြည့်ခွင့်မရခဲ့ပါဘူး။  အလောင်းကို အစောင့်အကြပ်များနဲ့ သယ်လာပြီး အစ္စလာမ်ဘာသာဝင်တို့ရဲ့ ထုံးစံအတိုင်း  ရုပ်အလောင်းကို  ရေချိုးပေးချိန်မှာတောင် ၀န်းရံစောင့်ကြပ်ခဲ့ကြပါတယ်။ အခု ကျွန်တေ်ာ့ဦးလေးရဲ့ ရုပ်အလောင်းက မြှုပ်နှံခွင့် ပိတ်ပင်ထားပြီဖြစ်တဲ့  ကန်တော်လေး စွန္နီသုဿာန်မှာ မြှုပ်နှံခဲ့ကြပါတယ်။

@@@@@@@

တပ်မတော်သားကောင်းတစ်ဦးပီသစွာ လက်အောက်ခံတပ်မတော်သားများအသက်ကို ကယ်တင်နိုင်ခဲ့တဲ့ ကျွန်တေ်ာ့ဦးလေးဟာ ဆုလာဘ်အဖြစ် နောက်ဆုံးအချိန်မှာ  ဆေးကုသခွင့်မရဘဲ ကွယ်လွန်ခဲ့ရပါတယ်။   အခု ဇွန်လ ၁၁ရက်နေ့ဆိုရင် နှစ်ပေါင်း နှစ်ဆယ့်တစ်နှစ် ပြည့်ပါတော့မယ်။ ဒီအချိန်မှာသာ သူရှိမယ်ဆိုရင်.........................

ဝင်းငြိမ်း


အခုဆက်ဖော်ပြပေးမှာက ဆရာဦးဝင်းငြိမ်းနဲ့ ဆရာမောင်သော်က အင်တာဗျူးပါ။ ပေဖူးလွှာမဂ္ဂဇင်းမှာ စတင်ဖော်ပြပေးခဲ့ပြီး  “ ၀င်းငြိမ်းနှင့် စာရေးဆရာများအတွဲ(၂) ” ထဲက ကောက်နုတ်ထားတာပါ။


မောင်ဝင်းငြိမ်း အခုလို လာမေးတာ ကျေးဇူးတင်ပါတယ်။ ဒါပေမယ့် ဆရာတစ်ခု ပြောချင်တာရှိတယ်။  ခုထုတ်ဝေနေကြတဲ့ မဂ္ဂဇင်းတွေမှာ အင်တာဗျူး ဆိုတာ မပါမဖြစ်သလောက်ခေတ်စားနေတာတွေ့ရတယ်။ ပေဖူးလွှာကဆိုရင် အခု မောင်ဝင်းငြိမ်းတာဝန်ယူထားတဲ့ စာရေးဆရာတွေနဲ့ တွေ့ဆုံပေးတာ။ နောက် တစ်မိနစ် အင်တာဗျူးမှာ ရုပ်ရှင်မင်းသား၊ မင်းသမီး၊ အဆိုကျော်၊ ဇာတ်မင်းသားတွေနဲ့ တွေ့ဆုံပေးတာတွေရှိတယ်။ တခြားမဂ္ဂဇင်းတွေမှာလည်း ဒီလိုပဲ ။ အနုပညာရှင်တွေနဲ့ တွေ့ဆုံပေးတာတွေရှိတယ်။  တော်တော်လည်း စိတ်ဝင်စားစရာကောင်းပါတယ။်

ဒါပေမယ့် တိုင်းပြည်က  စာဖတ်ပရိသတ်က တကယ်ပဲ ဒီလူတွေအကြောင်းသိချင်နေကြလို့၊ ဒီလူတွေ ပြောတာတွေ ဖတ်ချင်လို့  မောင်ဝင်းငြိမ်းတို့တစ်တွေက ထည့်ပေးနေကြတာလား၊ သို့တည်းမဟုတ်  သူတို့ကပဲ သိပ်ပါချင်နေကြလို့  ထည့်နေကြတာလား ။ ဒါတော့ ကွဲပြားဖို့လိုတယ်။  တကယ်အကျိုးရှိတဲ့အင်တာဗျူးဆိုတာက တိုင်းပြည်ရဲ့ ကဏ္ဍတစ်ခုမှာ တာဝန်ယူနေတဲ့ သူတစ်ယောက်နဲ့ တွေ့ဆုံပြီး  တိုင်းပြည်ရဲ့  တိုးတက်ရာ တိုးတက်ကြောင်းတွေ့ဆုံမေးမြန်းရင်ပိုပြီး အကျိုးရှိမယ်လို့ ဆရာထင်တယ်။   ဒါကြောင့် စာရေးဆရာ၊ အနုပညာသမားတွေထက် အင်တာဗျူးလုပ်သင့်တဲက သူတွေ အများကြီးရှိတယ်လို့ ကိုယ်ထင်တယ်။ အဲဒီလူတွေကသာ တိုင်းပြည်အတွက်သူတို့ လုပ်ဆောင်ချက်၊ ကြိုးပမ်းချက်၊ သူတို့ဘက်က တွေ့ကြုံရတဲ့ အခက်အခဲတွေကိုပြောပြရင် တိုင်းပြည်ကပိုပြီး နားလည်သဘောပေါက်လာမယ်။ 

အဲဒီလူတွေအပြင် တခြားအင်တာဗျူးသင့်တဲက လူတွေလည်းရှိတယ်။ ဥပမာ-  လမ်းပေါ်မှာ လျှောက်ပြီး ရှောက်သီးဆေးပြားရောင်းတဲ့ လူတစ်ယောက်ကို   အင်တာဗျူးလုပ်ရင် သူတို့ ပလတ်စတစ် ဘယ်လို ရှာရတယ်။  ရှောက်သီးဘယ်လိုဝယ်ရတယ်၊ မဆလာဘယ်လို ၀ယ်ရတယ်ဆိုတာတွေ ပြောပြလိမ့်မယ်။ ပလတ်စတစ်ကောက်တဲ့လူငယ်တစ်ယောက်ကို  အင်တာဗျူးလုပ်ရင်လည်း  စိတ်ဝင်စားစရာရှိမှာပဲ။  စာရေးဆရာတွေ။ ရုပ်ရှင်မင်းသားမင်းသမီးတွေ၊ အဆိုတော်တွေအင်တာဗျူုးလုပ်တာနည်းနည်းများလာတော့ တိုင်းပြည်ကနည်းနည်းအီလာပြီ ထင်တယ်။ ဒီတော့ တခြားအင်တာဗျူးတွေလည်း ထပ်စဉ်းစားကြပါဦး။ 

ဆရာကလောင်နာမည်ယူတာနဲ့ပတ်သတ်ပြီး သီးခြားအကြောင်းအရာရှိရင်သိချင်ပါတယ်။  စာပေလောကထဲဝင်ရောက်လာပုံကို ပြောရင်းထည့်ပြောပေးပါဆရာ

တော်သေးတာပေါ့ မောင်ဝင်းငြိမ်းရာ၊ ကိုယ့်ကို ကျော်သူလို ငယ်ငယ်ကတည်းက စမေးမလားလို့လန့်နေတာ။ငယ်ငယ်က ဖင်တုံးလုံးနဲ့ ပုံတောင်ရှာထားသေးတယ်။ ..........

“ဗိုလ်ဘသော်”ကလောင်က ဘာသာပြန်နဲ့ ဗဟုသုတဆောင်းပါးတွေရေးပြီး မောင်သော်က က ဟာသတွေရေးတယ်။ ဟုတ်ပါသလားဆရာ

................... မောင်သ်ာက က ဟာသ၀တ္ထုနဲ့ အစပြုခဲ့တယ်။ ဒီဟာသဥာဉ်က ဖျောက်လို့ မရဘူး။  အကောင်းဆုံးဟာသဥာဉ်တစ်ခုကို ပြောပြမယ်။ တစ်ခါက အမေရိကန်ပြည်ထောင်စုမှာ  လူတစ်ယောက်ကို လျှပ်စစ်ကုလားထိုင်မှာ အထိုင်ခိုင်းပြီး  သတ်တယ်။ သူ့ကို သတ်ခါနီးမှာ  နောက်ဆုံးအနေနဲ့ ဘာပြောချင်လဲလို့မေးတော့  သူက ကျွန်တော်တစ်ခုပဲသိချင်တယ်။  အခုလွှတ်မယ့် လျှပ်စစ်ဓါတ်အားက  အေစီလား၊ ဒီစီလား လို့ မေးသွားခဲ့တယ်။  ဒီလူရဲ့ ဟာသ ဇ၀နဥာဏ်ကို ဘယ်သူလိုက်မီနိုင်မလဲ။ သေခါနီးတောင် နောက်ဖြစ်အောင်နောက်သွားခဲကတယ်။  နောက်တစ်ယောက်က စာရေးဆရာကြီး မာ့ခ်တွိန်ပဲ။ သူ တစ်သက်လုံး ဘုရားမယုံကြည်တဲ့သူ။ သူသေခါနီးမှာ   ခရစ်ယာန်ဘုန်းကြီးတစ်ပါးက နောက်ဆုံးအာပတ်ဖြေတဲ့အနေနဲ့ “ ဆရာကြီးမာ့ခ်တွိန်....အခု ခင်ဗျား  ထာဝရဘုရားသခင်နဲ့ တွေ့ဆုံဖို့ အဆင်သင့်ပြင်ထားပြီးပြီလား” လို့မေးတော့ မာ့ခ်တွိန်က “ ကျုပ်ကတော့ အဆင်သင့်ပါပဲ။ ခင်ဗျားရဲ့ ဘုရားသခင်ကိုလည်း တစ်ဆိတ်ပြန်မေးကြည့်ပါဦး” လို့ ပြောသွားခဲ့တယ်။  နောက်ဆုံးအချိန်ထိ ခနဲ့သွားတဲ့ဟာမျိုးပါ။


............. Satire ဆိုတာက ဘာသာရေး၊ နိုင်ငံရေး၊ ပုဂ္ဂိုလ်ရေး  Religious, Political and Personal ဆိုပြီးရှိတယ်။  ကိုယ်လည်းစကားပြောရတာ အင်္ဂလိပ် ကောက်နုတ်ချက်ဝေါဟာရတွေများနေတော့ မင်းသိင်္ခရဲ့ ဖီလိုဆိုဖာ မောင်မြသာဖြစ်နေရင်ခွင့်လွှတ်ပါ။  ခြုံငုံပြောရရင်တော့  လူမှုရေးအနိဋ္ဌာရုံတွေကို ဖော်ထုတ်ပြီးသောတာပါပဲ။ လူမှုရေးအနိဋ္ဌာရုံဆိုတာ လူတွေရှိသမျှရှိနေမှာပဲ။  အရင်းရှင်နိုင်ငံ၊ ဆိုရှယ်လစ်နိုင်ငံမခွဲပါဘူး။  အမေရိကန်မှာ သာပြီးများသေးတယ်။  ပဒေသရာဇ်ခေတ်၊ မြေရှင်ခေတ် ဘယ်ခေတ်မှာမှ လူမှုအနိဋ္ဌာရုံနဲ့ ကင်းတယ်ဆိုတာမရှိဘူး။  ဒါကို ထိမိအောင်ရေးရတယ်။  ဆဲသလိုမဖြစ်စေရဘူး။  သက်ဆိုင်သူများကိုပါ အောင့်သက်သက်နဲ့ရယ်စေရမယ်။   Satire ကို အယ်ဒီတာက မတည်းဖြတ်တတ်ဘဲနဲ့ သွားပြီးတည်းဖြတ်ရင် ငုံးတိတိကြီး ဖြစ်သွားပြီး ဘာမှ မရယ်ရတော့ဘူး။  ဒီစာပေမျိုးထွန်းကားလာဖို့အလားအလာမရှိဘူး။  ရေးတဲ့သူလည်း ကိုယ့်သင်္ချိုင်းကိုယ်တူးတာနဲ့အတူတူပဲ။ 
အခြေအနေအကျဉ်းအကျပ်တစ်ရပ်ကို ရင်ဆိုင်တဲ့အခါမှာ   ဟာသဓါတ်ခံရှိတာဟာ အကောင်းဆုံး ရင်ဆိုင်ရဲတဲ့ သတ္တိကို ပေါက်ဖွားစေတယ်။  ပေါက်ကွဲတော့မယ့်  ဘွိုင်လာအိုးကြီးတစ်လုံးကိုေ၇နွေးငွေ့ထုတ်ပေါက်Safety  Valve ဖွင့်ပေးတာနဲကအတူတူပဲ။ လူတွေရဲက ရင်ထဲမှာ ခံစားချက်၊ မျိုသိပ်ရတဲ့ခံစားချက်တွေကို တစ်ဆို့ပေါက်ကွဲမတတ်ဖြစ်ရာက သက်သက်သာသာနဲ့ ထွက်ပေါက်ပေးလိုက်တာဟာ  Satireပါပဲတဲ့ခင်ဗျား။ 


.................အင်္ဂလိပ်စာတတ်ရုံနဲ့ ဘာသာပြန်ရင်တော့ အေဘီစီဒီကို ကကြီး ခကွေးဖြစ်အောင်ပြန်ရုံလောက်ပဲ ဖြစ်လိမ့်မယ်။ 




......ကဗျာဆိုတာ  ဘာသာပြန်လို့ရကောင်းတဲ့ စာပေမဟုတ်ပါဘူး။  ဘာသာတစ်ရပ်က တခြားဘာသာတစ်ရပ်ကို ပြန်ဆိုရာမှာ တစ်စုံတစ်ရာဟာ အခိုးအငွေ့ဖြစ်သွားပြီး  ပျောက်ဆုံးသွားစမြဲပဲ။  ဒီအခိုးအငွေ့အဖြစ်လွင့်ပြန်သွားတာဟာ ကဗျာပါပဲ။  Poetry is  what is lost in translation လို့ ကဗျာဆရာကြီး ရောဘတ်ဖရော့စ်က ပြောဖူးတယ်။ ကဗျာဟာ သူ့ကို မွေးဖွားသန့်စင်ရာ မိခင်ဘာသာရပ်မှာပဲ အလှပဆုံး ရှင်သန်နေလေ့ရှိပါတယ်။

...................Satire ဟာ အရွှန်းဖောက်စာပေပါပဲ။ စာပေမှာပုံသဏ္ဍာန်အမျိုးမျိုးရှိကြတဲ့ အနက် အရွှန်းဖောက်စာပေဟာစာပေဥယျာဉ်ထဲမှာ ပန်းတစ်ပွင့်ပါ။  စာပေပန်းတွေပွင့်လန်းကြစေဖို့က လူ့ဘောင်အသိုင်းအ၀ိုင်းရဲ့  ခွင့်ပြုချက်( Permissiveness of the Society) လိုပါတယ်။  Satire ကိုလက်ခံနိုင်ဖို့ရာ  လူတွေရဲ့ ဟာသ ဗီဇဥာဉ်ဟာ တရားသဘောနဲက ပြောရရင်တော့ “ ဖုဋ္ဌဿ လောက ဓမ္မေဟိ စိတ္တံ ယဿ န ကမ္ပတိ” ဆိုတဲ့ လောကဓံတရား ရှစ်ပါးကို  ကြံ့ကြံ့ခံနုိင်စေတဲ့ ဥာဉ်မျိုးပါ။  လောကရဲ့ အနိဋ္ဌာရုံတွေကို ရယ်စရာတစ်မျိုးသာ သဘောထားရပါတယ် ။ ခံစားချက်ကြောင့် တင်းကျပ်ပိတ်ဆို့မွန်းနေတဲ့ရင်တွေကို အသက်ရှုပေါက်ဖွင့်ပေးတာမျိုးပါ။  ဒါကို ရင်ချောင်ဆေးကျွေးတယ်မမြင်ဘဲ  သရော်တယ်လို့ထင်၊  သရော်စာတင်မရပ်သေးဘဲ  ဆော်စာ၊ ကလော်စာ၊  ဆဲစာအဖြစ် နာမည်တပ်မြင်နေကြတာတော့ ကိုယ်တောင်းပန်လိုပါတယ်။  ကိုယ့်ရေးခွင့်က တစ်နေ့တစ်ခြား ကျဉ်းလာတယ်။ “ မောင်သော်က ” သေတာအရေးမကြီးပါဘူး။  စာပေပုံသဏ္ဍာန်တစ်ရပ်ကို သတ်ဖြတ်တဲ့ နေရာမှာ ကိုယ် လက်သည်တရားခံမဖြစ်ဖို့ အရေးကြီးပါတယ်။  စာရေးဆရာကြီး မီလ်ကန်က “ စာပေကို သတ်သည်ဆိုခြင်းမှာ  လူသတ်မှုထက် ကြီးလေးပေသည်။  လူသတ်မှုတွင် လူ့အသက်တစ်ချောင်းသာ အကျုံးဝင်သည်။  စာတစ်ပုဒ်ကို သတ်သည်မှာ  လူမျိုးတစ်မျိုးလုံး၏ အသက်ဝိဥာဉ် ကို သတ်သည်နှင့် တူလှပေသည်။ ” လို့မိန့်ဆိုခဲ့ဖူးပါတယ်။ အဲဒီတော့ စာပေပန်းမျိုးစုံ ပွင့်လန်းကြဖို့ ကိုယ်ဆုတောင်းပါတယ်။

ပေဖူးလွှာမဂ္ဂဇင်း၊ အမှတ် ၆၅-၆၆ ၊ အောက်တိုဘာ- နိုဝင်ဘာ၊ ၁၉၈၆။


ကဲ..........

ဒီလောက်ဆိုရင်တော့ ဆရာမောင်သော်က အကြောင်းတစ်စေ့တစ်စောင်းနဲ့ အဖိုးတန်စကားများကို ဖတ်ရှုမှတ်သားရတာ ကျေနပ်နိုင်မယ်ထင်ပါတယ်။  မကျေနပ်နိုင်သူများအနေနဲ့လည်း ဆရာမောင်သော်က ရဲ့ လက်ရာများကို ရှာဖွေ ဖတ်ရှုကြလိမ့်မယ်လို့ မျှော်လင့်ပါတယ။်


လေးစားလျက်

ဝေမိုးနိုင်(မုံရွာ)

No comments:

Post a Comment